Nuebe gimnasta di Federacion Gimnastico Arubano lo participa den e Copa Panamericano di Union Panamericano di Gimnasia, cu lo tuma luga di 18 pa 20 di november na Guatemala.
E participacion aki ta forma parti di e proceso di desaroyo di gimnasia artistica na Aruba y e trabou di preparacion pa forma un seleccion nacional den diferente categoria di edad.
Presidenta di Federacion Gimnastico Arubano, Milly Bagheri, a expresa su satisfaccion cu e oportunidad pa e atletanan participa den e competencia internacional. Durante un acto special, e federacion a entrega uniformnan nobo y paketenan di competencia y entrenamiento na e deportistanan, gracias na un donacion di Divi Hotel, via su Impact Foundation.
Segun Bagheri, e seleccion ta consisti di ocho atleta den diferente categoria, incluyendo UPAG 1, UPAG 2 y UPAG 3, ademas di un gimnasta den categoria hubenil. E atletanan a wordo scogi despues di un proceso di evaluacion cu a cuminsa cu un campamento intensivo, den cual aproximadamente 18 mucha di diferente club a participa bao guia di un specialista.
E presidenta a indica cu e federacion a invita tur e clubnan pa presenta nan miho atletanan, cu despues a pasa pa un proceso di seleccion. Di e grupo inicial, ocho gimnasta a wordo scogi pa prepara pa e competencia Panamericano.
Bagheri a aclara cu e obhetivo principal no ta necesariamente pa conquista un puesto di honor, sino pa e atletanan por representa Aruba di manera digno, demostra nan capacidad y gana experiencia den un competencia di nivel internacional. E federacion ta pone enfasis riba preparacion y ejecucion corecto di e rutinas, considerando e nivel di competencia cu nan lo enfrenta.
DESAROYO DI GIMNASIA ARTISTICA NA ARUBA
Coach nacional di seleccion di Aruba di gimnasia artistica femenino, Jimmy Palma, a destaca cu e participacion aki ta resultado di un proceso di desaroyo cu ta dura mas di 17 aña.
Palma a splica cu e trabou a cuminsa cu gimnasia recreativo y a progresa gradualmente pa e parti competitivo. Durante e añanan, e federacion a dedica atencion na formacion di un semillero di talento, cu ta inclui diferente categoria, desde UPAG 1 te na categoria prehubenil y hubenil.
Segun e coach, anteriormente Aruba tabata conta cu apenas un of dos atleta den e nivel competitivo, mientras cu awor tin un proceso di formacion pa establece equipo den diferente categoria. E meta ta amplia e cantidad di gimnasta cu por integra e seleccion nacional y sigui desaroya nan capacidad deportivo.
Palma a reconoce tambe e contribucion di e mayornan, e atletanan y e comunidad na e proceso di crecemento di e disciplina. El a califica e trayecto como un proceso cu a exigi hopi dedicacion, pero cu a brinda satisfaccion y orguyo mirando e progreso cu gimnasia artistica a logra na Aruba.
E delegacion lo sali di Aruba dia 15 di november. Despues di yega Guatemala, e atletanan lo participa den sesionnan di entrenamento dia 16 y 17, prome cu e competencia oficial di 18, 19 y 20 di november.
Cu e participacion aki, Federacion Gimnastico Arubano ta sigui impulsa e desaroyo di gimnasia artistica y crea oportunidad pa mas atleta joven por avansa den e disciplina y representa Aruba na nivel internacional.
Aruba cu un delegacion historico di nuebe atleta na competencia UPAG*
Federacion di Gimnastica di Aruba (FGA) ta anuncia cu gran orguyo cu nuebe atleta lo representa Aruba na e competencia di Union Panamericana di Gimnasia (UPAG).
Ta di prome biaha cu Aruba ta participa cu un delegacion asina grandi na un competencia di e magnitud aki. Esaki ta marca un paso importante pa e desaroyo di gimnasia na nos isla.
E delegacion ta consisti di:
UPAG 1
* Nimra Martinus
* Yuna Fajardo
UPAG 2
* Sukiennice Valdéz
* Romy Fajardo
* Kaelyn Palma Villgas
UPAG 3
* Lyvah Bikker
* Leah Esguera
* Jira Oleana
Juvenil
* Malaky van Dinter
E participacion aki ta fruto di dedicacion, disciplina y hopi ora di entrenamento. Pa nos atletanan, ta un oportunidad valioso pa representa nan pais, gana experiencia y sigui crece den nan deporte.
E federacion ta gradici Divi Impact pa e colaboracion y e sosten cu a haci posibel pa nos atletanan conta cu nan uniform. Nos ta aprecia e contribucion na nos delegacion y na deporte na Aruba.
FGA ta desea tur e atletanan hopi exito. Competi cu confiansa, disfruta di e experiencia y representa Aruba cu orguyo. Boso trabou duro y perseverancia ta duna fruto.
Aruba ta orguyoso di boso!
