Habitantenan di San Nicolas y e barionan di Pariba di Brug pronto lo por haci uso di e servicio di NV Elmar bek cerca di cas, despues cu e compania a completa e renobacion di su oficina na San Nicolas. E reapertura ta representa un mehoracion di e instalacionnan, cu un concepto mas moderno y espacio adapta pa brinda cliente un atencion mas confortable y priva.
Despues di a cera e oficina na maart 2025 pa cuminsa cu e trabounan di renobacion, NV Elmar a celebra su reapertura durante un ceremonia cu a conta cu presencia masivo di habitantenan di San Nicolas y di e barionan rond di e area.
CEO di NV Elmar, Edward Oduber a expresa su satisfaccion cu e proyecto a yega na su culminacion y cu e compania por bolbe ofrece su servicio na e comunidad di San Nicolas. El a destaca cu e oficina renoba ta brinda un ambiente mas moderno, cu facilidadnan cu ta responde na e necesidadnan di cliente.
Segun Oduber, e presencia di hopi habitante durante e ceremonia di apertura ta confirma e entusiasmo di e comunidad pa tin e servicio di NV Elmar nuevamente den e area. Pa e habitantenan di San Nicolas y e barionan di Pariba di Brug, e reapertura ta nifica cu nan no mester baha pa otro partinan di Aruba pa haci cierto tramitenan.
Servicio ta cuminsa dia 27 di november
Oduber a aclaria cu e ceremonia di apertura tabata di caracter protocolario, mientras cu e servicio oficial pa publico ta cuminsa dia 27 di november. E oficina lo opera cu su horario regular, di 7:45 di mainta pa 4:00 di atardi, dunando e cliente oportunidad pa ricibi atencion y realisa nan gestionnan directamente na e sucursal di San Nicolas.
Un di e cambionan mas notabel den e renobacion ta e concepto di atencion na cliente. E oficina awo ta conta cu espacionan separa, caminda cada cliente por ricibi atencion mas priva den un ambiente mas confortabel, compara cu e sistema anterior di teller.
Oduber a splica cu e intencion di NV Elmar ta pa implementa e mesun concepto moderno aki tambe den otro sucursalnan di e compania, como parti di un proceso pa mehora continuamente e experiencia di su clientenan.
Elmar ta celebra temporad’i Pasco hunto cu comunidad
Ademas di e reapertura na San Nicolas, NV Elmar ta combina su actividadnan di fin di aña cu diferente celebracionnan di Pasco den su oficinanan.
Oduber a indica cu e programa a cuminsa cu e cendemento di e iluminacion na e sucursal di Hato, mientras cu e reapertura na San Nicolas tambe a tuma luga den un ambiente festivo, cu decoracion di Pasco.
E siguiente actividad ta tuma luga na e sucursal di Oranjestad, caminda e compania lo presenta e hardin di NV Elmar como parti di e celebracionnan di temporada.
Na final, Oduber a reconoce e contribucion di tur e trahadornan di NV Elmar cu a participa den e ehecucion di e proyecto, hunto cu e contratistanan responsable pa e trabounan di renobacion. El a expresa su satisfaccion cu e resultado final y cu e comunidad di San Nicolas awo por disfruta di un oficina renoba, mas moderno y cu un concepto di servicio enfoca riba privacidad y confort di cliente.
