Home » Audrey Croes: N.V. ELMAR a bolbe adopta rotonde di San Nicolas pa cendemento di luz

Audrey Croes: N.V. ELMAR a bolbe adopta rotonde di San Nicolas pa cendemento di luz

by Lis

N.V. ELMAR a continua cu su iniciativa ELMAR Holiday Tour, cu e cendemento di luz di Pasco na e rotonde na entrada di San Nicolas. Esaki ta e di tres parada di e tour, cu ELMAR a organisa pa crea un ambiente festivo pa e comunidad durante e temporada di fin di aña.

Audrey Croes, PR and Communications Officer di N.V. ELMAR, a splica cu e compania a adopta e rotonde na november di aña pasa, den cuadro di su celebracion di 75 aña. Desde e momento ey, ELMAR ta responsabel pa cuido di e area y tambe ta encarga cu su decoracion durante e diferente festividadnan di aña.

E actividad na San Nicolas ta forma parti di un programa cu a cuminsa na ELMAR Hato, unda cu a cende luz riba diasabra. ELMAR a continua cu e cendemento di luz y e evento di apertura na su localidad na San Nicolas. Awe ta e rotonde na entrada di San Nicolas cu ta haya su turno, mientras cu mañan e tour ta cera na ELMAR Oranjestad cu e apertura di e hardin di luz y e cendemento di luz di Pasco.

Pa e edicion di e aña aki, ELMAR a scoge e concepto di un Christmas Village. E rotonde tin diferente casita decorativo, incluyendo un cas dedica na Chispito, cu ta conecta cu e tema di e hardin di luz na ELMAR Oranjestad.

Croes a indica cu e dos localidadnan ta forma parti di un concepto hunto. E casita di Chispito na San Nicolas ta conecta cu e experiencia cu bishitantenan lo por descubri den e hardin di luz na Oranjestad.

Segun Croes, e iniciativa aki ta parti di e esfuerso di ELMAR pa brinda e comunidad di Aruba, y specialmente e habitantenan di San Nicolas, un ambiente special durante e temporada di fiesta.

ELMAR ta expresa su deseo pa e publico disfruta di e decoracionnan y ta reafirma su compromiso pa sigui cuida e rotonde y contribui na un ambiente festivo pa e comunidad.

Na final, Croes a desea tur hende un feliz temporada di fiesta na nomber di N.V. ELMAR.

Bo por gusta tambe

Adblock Detected

Please support us by disabling your AdBlocker extension from your browsers for our website.