Tabata diasabra ultimo, riba dia 2 di januari 2021 cu un baby a hera hoga den un tobo di awa, cu ta uza pa bañ’e. El a guli asina hopi awa cu su situacion ta hopi critico, te cu Hospital na Aruba no por a haci nada p’e y a pidi AZV pa mand’e urgente pa Colombia.
Antayera diadomingo a bin un Air Ambulance di Colombia pa bin busca e criatura y a transport’e pa Bucaramanga. Ey un ekipo di specialistanan cu hopi experiencia y cu ta conta cu ekiponan necesario pa brinda cuido specialisa na mucha. Aki na Hospital di Aruba, e specialistanan y nursenan a prepara e baby, cu tin mas of menos 1 aña, pa asina e por sobrebibi e biahe den avion.
Informacion ta bisa cu e baby a keda demasiado largo bou di awa y consecuentemente a sufri hopi daño dor di falta di oxigeno. Con esaki a sosode no ta conoci ainda, pero tur esfuerso awor ta pa salba e criatura y pa e por haya su salud bek.
E baby ta un mucha homber di fam Maduro y ta biba na San Nicolas. Nos lo sigui e desaroyonan di su tratamento masha di cerca y ta dese’e un pronto recuperacion.
