Esaki niun hende mester tin miedo di dje. E ta simplemente pa mira cu ta uza e placa di un forma eficiente. Ademas, Hulanda ta exigi tambe pa tin un miho control riba tur placa cu ta sali for di caha di gobierno. Tambe e stichting di scolnan catolico SKOA mester bay paga bek un suma di placa di mas cu el a haya. Y den esaki no ta bay haci excepcion, ta loke minister Armando (Rudy) Lampe, encarga cu enseñansa a bisa den conferencia di prensa di gobierno.
Den aña 2021 si ta bay duna forma na DUOS (Dienst Uitvoering en Onderwijs Subsidies). “Pa prome biaha nos ta bay tin un maneho financiero y un control financiero pa loke ta presupuesto di enseñansa. Mester mira control como algo positivo. Nos ta bay wordo scrutina e aña aki dor di Hulanda y controla financiero mas pisa. Nos mester mir’e como algo positivo. Un chens pa demostra pa demostra cu bo ta honesto cu placa di pueblo. Control cu nos ta bay eherce riba directivanan di scol no ta pa falta di confiansa,” e mandatario a splica.
Tabatin periodo, segun e mandatario, cu cosnan a bay for di control. El a duna e ehempel di loke a pasa cu SKOA, cu gobierno mester a pone placa extra (conforme ley) pa paga trahadonan di limpiesa. Aworaki no tin motibo pa niun scol di SKOA por tin problema cu limpiesa, ya cu a pone fondo extra disponibel. El a splica cu tin sentencia di Hues cu SKOA a actua contra ley den caso di e personal di limpiesa. E stichting a paga e trahadonan for di e pot di “onderwijs personeel” en bes for di e pot di “exploitatie kosten”, manera tur directiva di scol ta haci. “Tur directiva a haya e placa aki bou di e post menciona pa paga e trahadonan di limpiesa.
En resumen, e mandatario a bisa, SKOA a actua contra ley y mester coregi e situacion. Awo loke mester sosode ta cu SKOA mester cumpli cu ley, y no ta bay haci excepcion. Sino tur otro hende of instancia kier excepcion. E placa cu SKOA a haya di mas, lo mester pague bek. Den e acuerdo di Landenpakket ta para tambe cu tur fundacion cu a haya placa di mas, mester debolbe esaki. “No por haci excepcion. Tur directiva mester haya e mesun trato. Recientemente un stichting a haya placa di mas y a deposita esaki bek. Esaki ta loke nos ta pidi SKOA.”
