E compania di seguro medico general. AZV, a informa cu Ruben Goedhoop no ta director mas entrante awe. Manera ta conoci, den fin di siman a tuma e decision pa suspende e director. E ta relaciona cu un contract cu el a cera cu un compania pa transporte di pashentnan. A tum’e na malo pa motibo cu mester baha gastonan di AZV cu 5 miyon florin pa luna.
AZV den e comunicado a bisa: “Diabierna ultimo, 16 di october, prensa a informa riba e schorsing di nos director Ruben Goedhoop, pendiente investigacion. Nos kier clarifica cu e termino “investigacion” tambe ta inclui discusionnan cu mester tuma luga den e dianan cu a sigui y exploracion di mas hechonan. Pa evita cualkier duda, e termino no ta implica cu tabatin actonan fraudulento bou di investigacion.
Partidonan a finalisa e acuerdo di trabou di mutuo acuerdo entrante awe. Nos ta gradici Ruben Goedhoop pa su trabou, dedicacion y contribucion na e Organo Ehecutivo AZV y nos ta dese’e tur exito den su futuro proyectonan y liderazgo.”
Abogado mr. Dello Gomez a represente minister Dangui Oduber y Hunta di Supervision di AZV den e negosacion. Gobierno a hay’e ta paga Goedhoop den forma di un “golden handshake” pa e bay trankil, aunke ta dos aña so el a traha.
Mientras cu ta trahando riba e procedura pa yega na e persona cu lo tuma su luga, ir. Edwin jacobs, director di SVb, ta sigui maneha AZV como director interno. E lo combina e funcion cu esun otro di director di SVb. Esaki ta loke cu e Hunta di Supervision a informa den un comunicado.
