Theo de Jongh despues di a dedica 40 aña di su bida na turismo, a yega edad pa tuma un descanso y relaha. Despues di a traha na diferente seccion na Aruba Tourism Authority (ATA), el a finalisa su carera como database supervisor, el a bisa cu un sonrisa riba su cara.
Den combersacion cu ne, el a conta di su trayectorio largo den mundo di turismo. Awo e ta bay cu vakantie, cual ta acopla cu su pensioen. Despues e ta bay Boneiro pa pasa tempo cu su tata. E ta pas’e entre Aruba y Boneiro. Mescos cu el a traha cu dedicacion 40 aña, awo e tin 40 aña pa haci nada.
Traha 40 aña no ta un joke. Pero no cu e ta sinti cu e ta cla pa bay. Door di circunstancianan personal, el a dicidi cu e tin cu bay y pasa tempo cu su tata, dunando otronan chens pa e por sigui.
Con ta premira futuro di turismo
De Jongh a splica cu esaki ta un momento dificil pa papia di futuro, pero toch e ta kere cu Aruba su futuro ta bay pick up.Aruba semper a demostra cu e ta un isla cu ta bin bek despues di un crisis. Tin cierto factornan ta yuda pa bin bek.
E factor di kier e turista y trata e turista bon, ta factornan cu ta yuda bin bek mas lihe. E turista ta bay bin un luga cu e ta gusta, caminda ta apreci’e, cu e hendenan ta amabel. Ta factornan cu ta yuda cu e hendenan ta bay bin bek mas lihe.