Riba e caminda di Cura Cabay mainta trempan a sosode un accidente entre tres auto, pero un di e autonan a bandona e sitio. Esaki a sosode tegenover Napa Auto Parts. Polis di trafico tabata na e sitio pa tuma tur informacion di tur partido envolvi den e accidente.
E accidente tabata entre un Chevrolet Spark y un Honda Accord, mientras cu e di tres auto a bandona e sitio. E chauffeur femenino di e Chevrolet Spark tabata keha di dolor di nek, pasobra recientemente el a haci un operacion. Esey a pone cu a pidi asistencia di ambulance, p’e paramediconan por controla e señora.
Tambe a pidi asistencia di otro unidad policial pa desvia e trafico direccion Brasil. E Chevrolet Spark a ricibi golpi na e banda patras, mientras e daño di e Honda Accord tabata dilanti. Na yegada di ambulance, e paramediconan a atende cu e chauffeur y a opta pa hib’e hospital pa un checkeo medico avansa.
