Awe tabatin sentencia den e caso penal contra e piscado Alberto Roberto Laveist. Corte a hay’e culpabel y a dun’e un multa. Ta trata di e caso cu a sosode aña pasa riba 28 di augustus y 5 di september. El a sali bay pisca sin permiso di Havenmeester y tampoco a pidi permiso di Havenmeester ora cu el a drenta cu e piscanan. E tempo ey tabatin un areglo ministerial cu ta prohibi tuma pisca for di botonan stranhero.
Pa corte, e acusacion di dia 28 a keda completamente proba. Den e di dos caso no a keda proba e parti cu el a tuma pisca for di boto stranhero. Hues a splica cu den e corto tempo cu el a sali bolbe e por ta posibel cu el a recoge e piscanan den su palamber cu el a laga den lama.
Hues a splica cu ta tuma e acusado na malo cu el a trece salud di pueblo na peliger. Pa e dos casonan aki el a haya un multa total di 5 mil florin. Mester menciona cu fiscal di Ministerio Publico a haci un demanda di multa na balor di tres mil florin pa cada biaha, pues lo tabata kier a mira hues impone e multa di seis mil florin. Pero, hues no ta haya cu na e di dos ocacion por prueba cu a tuma pisca over di otro boto, pa cual a reduci e multa di tres pa dos mil florin, pa e cera un suma total di cinco mil florin na multa.
Riba e dos fechanan ey a confisca rond di mil kilo di pisca for di Laveist, na balor di 18 mil florin of mas. Abogado Gabri de Hoogd, cu a yega laat despues di e sentencia, a informa cu di biaha e lo apela e decision aki.
