Secretario di Estado Van Huffelen di Asuntonan Interno y Relacion den Reino a nombra E.E. (Edison) Rijna como representante special na Caribe Hulandes pa fondonan di Union Europeo, Fondonan di Nacionnan Uni y Asuntonan economico pa loke ta trata Latino America. Rijna ta cuminsa dia 18 april 2023 den su funcion nobo y na mes momento lo baha como gezaghebber di Entidad Publico Boneiro.
Cu su nombramento como representante special den e añanan binidero e gezaghebber actual di Boneiro lo enfoca entre otro riba miho acceso na fondonan di Union Europeo (EU) y Nacionnan Uni (VN) pa e islanan BES (Boneiro, Saba y Sint Eustatius). E lo zorg di mantene contacto cu comision Europeo na Bruselas y e organisacionnan afilia na VN cu ta relevante pa e islanan BES. Aki e lo identifica proyectonan cu lo brinda oportunidad nobo na nos islanan.
Banda di esey como representante special pa relacion economico pa Latino America e lo guia misionnan economico pa y di Latino America. Meta di e misionnan aki lo ta pa duna compania y otro organisacionnan di islanan BES miho acceso na e mercadonan den cercania y pa lanta interes cerca e paisnan den bisindario pa inverti y haci negoshi riba e islanan BES. Un volumen mas grandi di haci negoshi y inverti ta yuda fortalesa economia di e islanan.
Secretario di estado van Huffelen ta entusiasma cu e nombramento: “mi ta hopi contento cu Rijna a acepta e reto aki. Cu su varios añanan di experencia como gezaghebber y c’un red internacional amplio den region, mi ta convenci cu como representante special e por ta di gran nificacion pa e islanan i Hulanda. Den su rol nobo e por duna un aporte importante na acceso na fondonan di EU y VN, aumenta prosperidad y amplia e base economico. Nos ta gradicido pa Rijna su gran esfuerso haci como gezaghebber di Boneiro.”
Edison Rijna ta gezaghebber for di 2014. Na 2020 a bolbe nombr’e pa un periodo di 6 aña como gezaghebber. Pa mas cu un aña caba e ta alabes Territorial Authorized Officer (TAO) pa Boneiro na Union Europeo: “Den mi rol di representante special mi por explora posibilidadnan nobo pa Boneiro, Saba y Sint Eustatius pa cooperacion internacional. Dor di nos relacion cu EU, tin hopi oportunidad cu nos por probechá di dje. Esaki ta conta tambe pa algun organisacion cu ta ki bou di Nacionnan Uni cu por nifica hopi pa nos islanan. Mi ta contento di por bay traha riba relacionnan fructifero cu varios partido envolvi. ”
E nombramento aki ta drenta na vigor riba 18 di april 2023. For di e momento ey Nolly Oleana lo fungi como gezaghebber interino te na momento cu termina e proceso di solicitud pa un gezaghebber nobo.
