Ta importante pa nos restourá e daño ku a wòrdu hasi na momento ku a muda Kas di Kòrsou pa Prinsegracht. Histórikamente Antillenhuis for di aña 1956 i Kas di Kòrsou na aña 2010 a keda establesé den e edifisionan na Badhuisweg i Wagenaarsweg.
Pa malisia i mal maneho a saka kas di Kòrsou for di e lokalidatnan aki i muda Kas di Kòrsou pa un edifisio defisiente na Prinsegracht. E tres edifisionan (Badhuisweg i Wagenaarsweg) a keda poné na benta, bou di nan balor real. Durante e reunion di 26 di sèptèmber 2017 Parlamento di Kòrsou a para e benta di e edifisionan ariba menshoná.
Esaki a resultá den un kaso den Korte, ku pais Kòrsou a gana. Korte tambe a konstatá ku e benta tabata kontra di lei i a ordená ku e kontrato wòrdu eliminá. Nos mester keda konsiente ku awe nos lo por tabatin gastunan enorme, pèrdida di un montante di mas ku 4 mion i tambe pèrdida di 3 edifisio pa motibu di mal maneho di pasado.
Durante suskrito su bishita di trabou na Hulanda, mi a bishitá e edifisionan na Badhuisweg i Wagenaarsweg. Tur 3 edifisio awor aki tin ‘antikraak’, pa evitá ku e edifisionan aki ta keda distruí. Sumamente importante pa komunidat keda informá kiko ta bai sosodé ku e tres edifisionan aki. I tambe e edifisio na Prinsegracht den kual Kas di Kòrsou ta ubiká aktualmente.
Den kuadro di esaki suskrito tin algun pregunta pa Minister Jesus-Leito:
- Minister Jesus-Leito lo por indiká na Parlamento kua ta e intenshon di Gobièrnu di Kòrsou pa ku e edifisionan aki?
- Minister Jesus-Leito por informá na Parlamento ku si ta e intenshon pa Kas di Kòrsou keda re-aloká pa e edifisionan na Badhuisweg i Wagenaarsweg, manera tabata for di aña 1956?
- Minister Jesus-Leito lo por fasilitá Parlamento di Kòrsou ku informashon tokante e pasonan ku Gobièrnu di Kòrsou a tuma pa mantené i kuida e edifisionan aki?
Den kaso ku muda Kas di Kòrsou pa Badhuisweg i Wagenaarsweg, Minister lo por indiká na Parlamento kiko lo sosodé ku e edifisio na Prinsegracht?
