No ta mucha dia pasa cu Parlamentario independiente, mr. Gerlien Croes a cuestiona cu presidente di parlamento a haya un auto nobo sin consulta cu parlamento. Comosifuera poco, a ricibi un auto di casi shen mil florin. Ta cuestiona cu mientras pueblo ta pasa den duro, politiconan na poder, entre nan hasta presidente di parlamento, mr. Edgard Vrolijk.
A busca mesora reaccion di presidente di parlamento. Diabierna atardi na su salida for di parlamento a acerca e presidente p’asina ricibi su reaccion. Segun Vrolijk, e ta un procedura normal pa presidente di parlamento haya un auto di parlamento. E no ta e prome y tampoco lo ta e ultimo. Ta mas bien un show cu mr. Gerlien Croes kier haci. Ta griffier di parlamento y e seccion di bedrijfsvoering ta encarga pa selecciona auto. E biaha aki, a opta pa sigui cu e marca Honda. Pa e ultimo añanan, parlamento a keda fiel na Jossy Motors. Y ta lease auto di marca Honda pa e presidente.
Vrolijk ta lamenta tipo di expresion asina. Locual si Vrolijk a haci ta, corta den vergoeding di telefon di parlamentario. Antes parlamentarionan tabata ricibi telefon nobo cada aña. A cambie cu, en bes di un, awo ta ricibi cada dos aña. Adicional, e costo di ‘roaming’ tabata haltisimo, ta algo cu Vrolijk a corta tambe. Tur esey a spaar pueblo un total di 1.3 miyon florin pa aña, segun el e comenta. E auto no ta di dje, unico auto cu e tin, ta su pickup marca Nissan modelo Frontier color preto. E auto ta pertenece na parlamento y dia e baha como presidente, e no ta bay cu e auto.
