Edad y condicion mental ta determina si ley ta husga como adulto of hoben

Ekipo di 24ora a entrevista abogado Demis Illes pa consulta cune un poco riba loke ley penal ta prescribi ora cu un menor di edad ta comete un crimen.

Illes ta gradua na 2006 na Hulanda y ta forma parti di e bufete DK Legal. E ta practica ley publico y priva, pero ta specialisa riba ley laboral, administrativo y penal.

Ley ta defini un persona como mayor di edad for di momento cu e cumpli 18 aña. Ley Penal ta conoce ‘Jeugdstrafwerk’ y cu ta aplicable pa tur persona entre 12 y 17 aña. Esaki ta nifica cu si bo tin 18 aña of mas, bo ta huzga bou Ley Penal comun.

Adicionalmente, tin un criteria den ley cu ta indica cu si e acusado tin entre 13 y 17 aña, tin aspectonan cu un Hues por tuma den consideracion pa dicidi si e ta aplica ley penal comun, of e ley penal pa adolescente. Esaki ta conta tambe si e acusado tin entre 18 y 21 aña; esta cu un Hues por decidí cua ley e ta aplica a base di cada caso su specificacionnan.

Punto di salida den e evaluacion aki ta e fecha di nacemento di e individuo, e edad cu tabatin ora el a comete e hecho, entre otro circunstancia.

Edad y condicion mental ta determina si ley ta husga como adulto of hoben

Edad y condicion mental ta determina si ley ta husga como adulto of hobenhttp://24ora.news/39d3zfV

Posted by 24ora on Friday, January 8, 2021

Condicion Mental

Depende di e gravedad di e hecho, e personalidad di acusado tambe ta keda considera. Aki ta caminda ta wak si e ta cay bou di e spectro di autismo, of tin algun deficiencia den su desaroyo. Hues ta evalua esaki a base di e opinion di un experto psicologico.

E beneficio di un ley pa adolescente ta cu ainda por purba coregi e individuo. Por duna un castigo mas abou y tuma medidanan pa e hoben ta den un instituto special cu por rehabilit’e. “Tur e aspectonan ey ta relevante pa wak cu cual ley e ta wordo husga,” abogado Illes a indica.

El a duna un hempel bisando cu “Si bo tin 16 aña, fiscal por bisa cu mirando e gravedad di e hecho y e personalidad di e agresor, tin posibilidad pa trat’e como un adulto.” Ta keda na fiscal pa convence Hues cu tin motibo pa cual e ta cumpli cu e criteria; pa apesar di e edad, aplica ley penal comun. Ta bon pa tene na cuenta cu esaki ta solamente si tin 16 aña of mas. 15 aña of menos, ley ta hopi cla cu ley penal comun no ta un opcion.