Zulema Erasmus ta hefe na Economische Zaken den e sector di Buitelandse Betrekkingen y Desaroyo Comercial. E ta presente na Bogota cu e delegacion cu a bay pa busca e posibilidadnan di haci negoshi. Minister Geoffrey Wever tambe ta den e delegacion cu Camara di Comercio. Durante un combersacion cu Zulema Erasmus a toca e tema di carni for di Colombia. Pa basta aña na Aruba ta imposibel pa trece carni for di Colombia. E comerciantenan cu ta bende carni na diferente ocasion a atende esaki cu diferente gobernacion na Aruba. Te awe esaki no a logra. Awendia e mataderonan na Colombia ta certifica.
Durante entrevista Zulema Erasmus a splica cu e tema aki ta uno di hopi aña. Aña pasa caba riba nivel di gobierno un delegacion di Aruba a atende esaki. Colombia tin interes pa exporta carni pa Aruba. Aruba su ley ta hopi stringente y esey ta haci e situacion dificil pa carni drenta nos isla. Na juli aña pasa tabata tin un delegacion di gremio di Colombia cu a bin Aruba pa duna presentacion. Nan a mustra ki tur tin caba na Colombia den maneho di carni.
E tema di carni lo bin den e bishita comercial na Colombia e siman aki. E minister cu t’ey ta prepara pa esaki, segun Zulema Erasmus. E delegacion tambe ta cla pa atende cu e tema. Aunke e no ta su experticio, segun Zulema Erasmus, e experto ta na Veterinaire Dienst na Aruba.
Segun por a compronde, e carni cu ta drenta Aruba mester ta aproba sea via e standardnan di Merca of Europa. Basicamente loke nos na Aruba ta haci ta mira si e matadero ta certifica door di Merca of Europa. Esaki no ta e caso awor aki, segun Zulema Erasmus di Ecnomische Zaken.
