Ora nos sa cu algo no ta bon, cu e ta un asunto di principio, di respet y moral, y di boluntad di Dios, y asina mes nos ta hacie of apoya locual ta inmoral. Nos ta perde tur integridad, pasobra a keda demostra cu nos no tin compromiso cu Dios.
Nos ta mira cu ta e direccion ey ta locual mundo ta bayendo den dje, caminda hende kier complace cu hende. Y cu hopi biaha ta nifica complace cu diabel, pasobra pa nos complace cu hende nos mester rechasa locual Dios ta bisa.
Nos tur tin cu tene cuenta cu lo siguiente, pasobra nos ta bibando den tempo trabahoso y diabel tin hopi forma di gaña hende. Tin hende ta kere cu nan por drenta den fierno pa drecha diabel, y Dios su palabra ta bisa pa nos cuidao cu yugo desigual, pasobra ki harmonia Cristo tin cu Belial.
Ki comunion luz tin cu scuridad (2 Corintionan 6:14-15).
Mi ta keda asombra cu asina lihe boso a bandona. Esun cu a yama boso pa e gracia di Cristo, pa un evangelio diferente cu realmente no ta un otro, solamente tin algun hende cu ta haci boso bira intrankil y cu kier troce e evangelio di Cristo (Galationan 1:6+7).
No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel, y perfecto boluntad di Dios (Romanonan 12:2).
Hende ta perde compromiso cu Dios, ora inmoralidad, material, placa y posicion ta domina, pasobra tur eseynan ta hinca nos den compromiso cu e mundo y nos lo complace cu mundo mas cu Dios (Galationan 1:10).
Ta dificil pa bo ta cu Dios, y bo ta sali na defensa di inmoralidad of bagamunderia cu bo sa masha bon cu e cosnan ey no ta agrada Dios.
Tur hende cu ta pone Dios un banda pa apoya mundo y su maldad, pa nan keda bon cu hende, nan lo ta desenmascara publicamente, pasobra nada lo no bay keda scondi.
Dios ta permiti cosnan tuma luga, pa nos busca madurez spiritual, pasobra e tempo di Su binida ta cerca. Dios su palabra ta bisa cu na nan frutanan lo bo conoce nan. Esey ta nifica cu na un hende su forma di pensa y su actitud, lo bo haya sa si e tin compromiso cu Dios, of ta simplemente un persona di curason dobel.
Mira pa ningun hende no gara boso preso door di filosofia y engaño envano, segun tradicion di hende, segun e principionan elemental di mundo y no segun Cristo (Colosensenan 2:8).
Tin hopi hende ta kere cu nan por separa Dios for di un asunto, pa asina nan por haci locual cu nan kier. Nos por mira bon cla con e palabra di Dios menciona den 2 Timoteo 3:1-5 ta cumpli. Nan ta rechasa Dios y continua cu nan bagamunderia, pero tardi of tempran hende mester duna cuenta na Dios.
Ora nos ta den rebeldia contra Dios, y nos ta pone tur compromiso cu Dios un banda pa nos por haci e cosnan den nos propio forsa, nos tin di corda cu Dios ta mira tur cos.
Dios ta buscando homber y muhe cu nan si ta si y nan no ta no, y cu nan lo para firme den fe, pasobra e dianan ta dificil. Ta tempo pa nos faha nos mes den oracion, den ayuno pa Dios tene misericordia y habri nos wowo, pa nos permanece den Su caminda (Lucas 21:19).
Sinceramente,
Pastoor Marcel Balootje.
