Noticia tristo a bati na porta di un famia Arubiano na Miami diahuebs atardi. Na un Penthouse na Biscayne Boulevard e vakantie di un famia a caba cu un dolor grandi. Nan yiu Justin Fernandes Pedra a cay for di un piso basta halto y fayece.
E mucha di apenas 9 aña tabata hunto cu su ruman homber Collin di 6 aña. Nan tabata hunga y pa un of otro motibo a sali via e porta di Fire Escape. Para pafo el a mira abou y tabatin manera un lona blauw grandi. Manera un dak di lona. Justin ta gusta cosnan extreme.
Esey su tata a confirma na nos tambe durante un combersacion telefonico. Nan tabata cerca e mama cu ta biba den e Penthouse hunto cu su casa. E tata a bay cu tres yiu Merca pa asina pasa vakantie. Diaranson nan a bay y tabata preparando pa asina sali diahuebs atardi pa Orlando.
El a bisa e tata cu e kier mira su mama prome cu nan sali pa Orlando pa vakantie. E mama cu ta bibando na Merca cu su casa, tambe tabata di bay hunto cu henter e famia. Kiermen e tata lo a bay cu su pareha cu su yiunan y e ex pareha cu ta casa tambe lo a bay hunto.
Henter e preparacion a caba den un tragedia pa henter e famia. No sa precies di cuanto piso Justin a cay. Ta wordo menciona cu el a cay sea di tres of ocho piso. Ora cu e kier a bula, el a bisa e ruman Collin di 6 aña pa bula hunto cune. El a kere cu e lona blauw ta un style di Dino Jump.
E ruman di 6 aña no a bula. El a keda ariba. Asina mes prome cu Justin a bula, el a bise pa no worry nos no ta muri. Ban bula. Justin su so a bula y su caida tabata mortal. A cuminsa un investigacion mesora di autoridad Mericano. Nan a traha cu Justin dunando reanimacion. Helicopter a bin y e tata Oldric Fernandes Pedra mes a bay abordo te Hospital mientras nan tabata traha cu su yiu. E tata ainda no por compronde kiko a pasa. El a conta cu net e tabata cabando cu e booking di e hotel na Orlando pa asina nan sali cu auto y bay cori. Nan a perde e muchanan un rato kizas pa cinco pa diez minuut. Y despues a resulta cu su yiu Justin a bula pensando cu e lo yega abou riba e dak manera un lona blauw. E tata no por caba di compronde kico por a pasa den cabez di su yiu Justin.
E rumannan Justin y Collin ta inseparable. “Mi Bida A Bay”, esey tabata palabranan di e tata. Famia tabata desespera na Miami cu e situacion aki. Television Mericano a haci full un reportahe riba e caso tristo aki for di prome momento. Polis tambe a duna un declaracion. A desea e tata hopi forsa cu e situacion cu a presenta. E rman Collin di 6 aña a conta autoridad Mericano kico a sosode. Awor famia mester cuminsa haci preparacion pa trece Justin Fernandes Pedra Aruba. Justin algun siman pasa a representa Aruba na Bogota cu Go Karting. El a haci un tremendo papel. E tata tabata pushe hopi den e deporte di Karting. Den e prome siman di October tabata haciendo preparacion pa asina Justin core atrobe den caredanan na Bogota. Forsa na e famia y cu Justin sosega na paz.
