Awe diahuebs atardi a tuma luga un seminario riba “Cambio”, organisa pa Grant Thornton, den ballroom di Hyatt Regency. Un publico grandi di empresarionan y clientenan a bay scucha riba e dos temanan specifico: Cambio di PWC pa Grant Thornton y e cambionan fiscal cu ta anticipando na Aruba na cambio di aña.
Drs. Ing. Edsel Lopez RA, partner den Grant Thornton a bisa despues di e seminario cu e preguntanan y reaccion di publico tabata impresionante. Tabatin hopi interes pa e topico di cambio. Semper ora di cambio ta bin incertidumbre, duda y skeptismo. Pero ta depende con ta maneha e proceso di cambio ta haci cu partidonan envolvi ta haya confiansa y ta sostene e cambionan.
Pa loke ta e cambionan fiscal, Lopez a splica cu nos isla ruman Corsou a caba di introduci varios cambio fiscal, debi na regulacionnan na OECD. E Accountant ta anticipa cu e mesun leynan aki lo por bira aplicabel pa Aruba tambe. Den e cuadro aki a duna mas informacion pa invitadonan por ta prepara pa posibel cambio den nos sistema di belasting.
Randall Croes, un economista reconoci riba nos isla, a bisa despues di e seminario cu Aruba no por keda atras mas den diseño di sistemanan fiscal. Na Corsou por ehempel nan ta hopi mas adelanta cu nos, cu varios pakete y incentivonan fiscal riba diferente tereno. Esey ta haci Corsou un mercado atractivo pa e industrianan ey, por ehempel pa proteccion y inscripcion di marcanan y hasta pa musica.
Di otro banda, Hulanda siendo ‘madre patria’ tambe ta haciendo cambionan drastico den nan sistema di impuesto. Asina por ehempel a elimina “dividend belasting” for di nan sistema. Aruba mester por sigui competi pa haya negoshinan bin establece riba nos isla, teniendo cuenta cu e realidad di e cambionan fiscal cu tanto Corsou como Hulanda a implementa caba. Ta asina so nos lo por keda competitivo den mercado internacional.