Director di KIA ta na cas, pa algun siman caba, asina Minister Rocco Tjon a confirma awe durante un conferencia di prensa. Segun e minister, cu ta politicamente responsabel pa maneho di prizon na Aruba, cu for di aña pasa caba a menasa Gino Winklaar cu morto. Tipo di menasanan asina ta tuma masha na serio y no ta keda cu mannan crusa.
Ken a menas’e y kico e menasa ta specificamente no a menciona. Mninister Rocco Tjon a sigura cu tin un departamento independiente cu ta investiga tipo di menasanan asina contra mandatario y hefenan di departamento. Nan a conseha pa miho Gino Winklaar no regresa KIA por lo pronto, tanten cu no por garantisa su sigurdad na pia di trabou. Riba nos pregunta cu si ta ex-preso of un preso actual of si ta trahado a menas’e, no a bin contesta di e mandatario.
Kier reorganisa prizon di Aruba
Su tras a menciona si cu, pa casualidad, e ta trahando riba un reorganisacion den Korrectie Instituut Aruba. Minister Tjon, pa di dos biaha, mester a subraya cu no ta su intencion pa core cu Gino Winklaar for di e funcion. Winklaar tabata colega di Tjon den Cuerpo Policial Aruba y desde e prome dia cu el a asumi e funcion di minister, tabatin rumor cu lo ta su intencion pa hala Winklaar di e funcion. Na november 2021, Minister Tjon a bisa cu e ta na mesa cu sindicatonan pa reorganisa e departamento pero no cu esey kiermen automaticamente cu lo kita e director.
Nombracion oficial a keda cla prome cu eleccion
Ex-minister mr. Andin Bikker a nombra Gino Winklaar como director di KIA dia 7 di juni 2019. Tabata despues cu KIA tabatin casi dos aña sin un director, debi cu e propio minister di husticia actual, e tempo ey a bandona su funcion pa drenta politica despues cu ex-minister, mr. Arthur Dowers(AVP) a nombr’e como director. Tabata riba un14 di mei 2021 cu a oficialisa e nombracion di Gino Winklaar como director di KIA, conforme un Landsbesluit. Esaki a sosode net un luna prome cu eleccion parlamentario, cu a pone cu e ex-minister di husticia no a regresa mas den e funcion.
Ken ta Gino Winklaar
Gino Winklaar a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di Inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo. Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas.
Tocante KIA
Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues 31 aña pasa. E prizon tin un populacion di un maximo di 200 detenido, parti den detencion preventivo, seccion di hende muhe y seccion di hubentud. Na KIA tin mas o menos 180 empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.
