Diasabra ultimo a tuma luga un competencia di e deporte di BMX den Parke Curason na Jaburibari caminda cu tabatin coredor den diferente categoria.
Gregory Wouters, coach di e team di Rough Riders a conta cu tabatin bastante mucha ta core den diferente categoria.
Nan tabatin cinco mucha den Strider, (muchanan bao 5 aña) y nan a coy basta premio. Tambe tin expert y novice class, caminda cu tabatin mucha cu a participa.
Nan a logra basta bon resultado durante e competencia aki.
Pa loke ta e expectativa di e aña aki, danki na Ferguson Flanders cu a bin cu un point series di Best v/s Best. Ta careda local y despues den aña e ta bira internacional cu coredo di afo.
Ta un point series unda cu e muchanan ta haya chens pa bataya contra otro y pa fin di aña ta mira e puntanan pa mira ken ta sali prome, di dos y di tres luga.
Wouters a comenta cu esaki ta un deporte cu hopi aña ta existi. E aña aki e deporte a bolbe lanta cabes. Den 2021 el a crece basta bon y por mira cu hopi mucha ta cuminsa, specialmente den esunnan mas chikito. Por bisa cu e ta bayendo super bon.
Crystal Wever, mama di un di e coredonan, a comenta cu hopi coredo den e categoria di striders cu a competi contra otro.
Su yiu homber Keanu Bremo a competi y a gana prome luga. Esaki tabata su di dos biaha cu el a gana prome luga y pronto lo bay cu ne Merca pa competi den e categoria di strider, manera cu sa hiba e otro muchanan mas grandi.
Wever ta invita cada mayor pa trece e yiu chikito. Si e tin un, dos of tres aña, e ta mas cu bonbini. Acerca un di e ekiponan cu tin na Aruba y lag’e disfruta, pasobra nan ta pasa super dushi.
Pa un cobertura mas amplio lesa TREMPAN.
