Diadomingo mainta durante cobertura di un incidente na aeropuerto un di e miembronan di siguridad a dal telefon di un reportero na dos ocasion y benta esaki riba vloer. El a pasa den parkeerplaats pazuid di esun di e taxistanan. E reporteronan a yega y tabata riba un distancia di 50 meter for di e sitio di e incidente.
Via un habri a logra haci cobertura cu e imagennan. Tabata warda e auto di funeraria yega pa finalisa e trabou. Tres miembro di siguridad di aeropuerto a presenta. Dos dama y un homber yama Kevin J. Nan a bin pa prohibi e cobertura. A splica nan cu den un minuut tur cos ta caba. Ya nos ta den e parti final di nos cobertura. Asina bay cu e curpa e trabou a caba. A cuminsa e discusion cu e tereno di aeropuerto ta priva. A splica nan cu un tereno priva mester ta cera pa cualkier acceso. Cos cu ya caba den pasado polis na varios ocasion den otro caso y corte mes a mustra aeropuerto riba dje. A sigui haci e trabou pa haya e imagennan ora ta hinca e curpa den e auto pa final di e trabou.
Kevin J a cuminsa hinca man den camara. Ta via un gleuf fini tabata coy imagen di loke tabata pasando. Ora un persona tabata graba Kevin tabata core bin hinca man den camara. A splica Kevin cu e no por haci esey y cu su autoridad tin limite. Parce cu e no a compronde. A splic’e tambe cu e no mag mishi. Asina mes e tabata move di un luga pa otro strobando e trabou. Logicamente na dado momento e ta esun cu ta sali den tur imagen.
Na dado momento Kevin J. a tira man riba e camara y ranca esaki. Ora otro colega a cuminsa graba su actuacion el a core pusha telefon den saco di e reportero cual el a ranca e telefon. Djey a sigui graba y a splic’e un biaha mas cu su actuacion di mishi y ranca no ta corecto. Den un otro intento pa graba via e gleuf el a para dilanti di e camara y despues a saca su man dal e telefon benta abou. E tabata wrong and strong. A mustr’e bon cla cu e tin su trabou y nos tin nos trabou. Tambe a bis’e cu su autoridad tin limite y ora cu un hende no cumpli cu su ordo of bis’e cu no ta di acuerdo cu ne, e tin obligacion di yama polis.
Finalmente e cos a caba cu e incidente y bandonando e sitio ainda Kevin J. tabata expresa cos pa causa problema. E reporteronan a sigui cana bay bandona e sitio. A bis’e cu lo notifica su superiornan riba su comportacion. Su contesta tabata cu e no ta worry, pasobra nan sa di dje caba. Si esaki ta actitud di un miembro di siguridad di aeropuerto, nos ta den un problema.
E dos damanan a mantene distancia y a comporta nan mes diferente cu Kevin J. Aeropuerto mester atende cu actitud di un miembro agresivo asina. Ta varios biaha sa haya yamada di e actitud di un of dos miembro di siguridad. Semper ta prefera di no duna esaki publicacion. Mal comportacion di un of dos ta daña pa tur e otronan cu si ta haci nan trabou. Den e caso aki, Kevin J. sa cu el a bay mucho leu cu su actuacion y un situacion asina por a caba diferente. Den e caso aki a scochi pa laga Kevin J. cu su actitud despues di ranca un biaha y dal telefon benta abou den un di dos biaha. Spera cu aeropuerto atende cu Kevin J. y mesun momento compronde cu ni maske boso tin den boso cabes cu e tereno habri cu miles di hende ta drenta y sali tur dia ta priva, tin hende cu diariamente ta pone tur potret y grabacion di aeropuerto. Den e caso aki a splica siguridad cu nan sa ken nos ta y nan conoce nos trabou. Den e proceso e trahado Kevin J. ta esun cu a daña e ambiente na final cu su actitud no controlabel y violento.
