E dia a yega, asina mes, ta for di un tempo caba Ministerio di Husticia basa riba un mocion aproba unanimente den parlamento, a duna Gilbert Senchi un tarea pa traha un busto di un polis cu a perde su bida tragicamente durante su oranan di trabou. Ta trata di Tino Ruiz. Cu awendia tin hasta un plaza na su nomber, Plaza Tino Ruiz. Ta locual a sosode diasabra atardi dilanti di warda di polis cerca di rotonde Noord, unda actual ta e warda di e polisnan di Motor Unit.
E tabata e momento hopi special pa famia y pa tur agente policial. A devela e busto y mesora inaugura e plaza. Como invitado special tabata presente; Minister Rocco Tjon, Minister Ursell Arends, altocomisario Ramon Arnhem, ex-altocomisario Dolfi Richardson, ex-hefe di Tino Ruiz Andrew Hoo y e top di Husticia riba nos isla.
Durante nan discurso por a saca algun cos comun. Mayoria ta vocifera e bon polis cu Ruiz tabata y cu semper tabata para cla pa yuda su cuerpo. For di Minister Rocco Tjon a scucha cu e plaza aki ta e simbolo pa nunca lubida e sacrificio di Tino, cu durante pleno trabou a perde su bida. Aunke cu e no tabata na Aruba e tempo ey, actual altocomisario drs. Ramon Arnhem a vocifera e grado di respet cu e tin pa un persona asina.
Como ex-altocomisario di Cuerpo Policial, tambe a hiba palabra Dolfi Richardson. Durante su discurso, el a bira hopi emocional pa cual e mester a controla su emocionnan. Ta cos bon so por scucha di Tino diasabra atardi. Gilbert Senchi t’e artista cu a traha e busto den su galeria na Bogota, Colombia, pa cual 24ora.com a bay te Colombia pa mira e desaroyo aki di cerca. Senchi e tempo ey a duna e ekipo di 24ora.com cabesa pa hefe di operacion, Nelson Andrade, henter un rekorido den su galeria. Awendia e busto ta cla y hasta a revel’e den e curason di Noord. Awor y nunca mas, por lubida riba e trabou y e sacrificio cu Tino Ruiz a haci pa su Pais, Aruba.
