No ta un secreto publico cu e gobierno aki ta gusta manipula cifra. Diferente biaha CAFT a desenmascara e gobierno pa nan cifra fantasma. Awor diripiente ta anuncia cu BBO na frontera lo genera 40 miyon florin for di e negoshinan ilegal. For di unda nan ta saca cu tin asina hopi negoshi ilegal? Unda gobierno ta saca afo si e negoshinan aki no ta paga belasting?
Gobierno den su presupuesta 2023 ta mustra claramente di lo genera 172 miyon florin segun e plan di impuesto. Manera menciona CURPA ta di opinion cu e 40 miyon ta fata morgana. Nifica cu gobierno ta resta 132 miyon florin pa saca for di pueblo. Si encaso gobierno haya toch rason cu den seis luna gobierno lo ranca 40 miyon na BBO na frontera, anto den un aña lo surpasa 80 miyon florin. Pues cueste lo que cueste e gobierno aki kier sigui masacra pueblo cobrando 132 miyon + 80 miyon. Tin dos splicacion esta gobierno mester di placa pa sigui malgasta y ta sigui ranca placa for di e galiña sin pluma. Un otro splicacion y segun CURPA esun mas plausibel ta cu e gobierno ta haci uzo di cifranan ficticio pa despista Hulanda?
Den e ultimo binti añanan gobierno a ricibi 24 biyon florin y a inverti solamente 600 miyon florin. Gastonan di gobierno ta sigui aumenta mientras ta ranca 60 miyon for di AZV y kier pa pueblo biba di un pensioen di behes di awg.1300,= y esunnan cu no tin trabao ta biba den miseria. Riba dje esunnan cu ta incapacita ora nan ta den hospital ta desconta nan onderstand. Segun informacion tin 10.800 mama soltera na Aruba. No solamente Aruba ta den un super mega debe sino tambe un supera mega crisis social.
No solamente nos grandinan, esunnan sin trabao, esunnan incapacita y mamanan soltero ta den problema sino pocopoco lo no bay tin clase media mas. Muchanan ta bay scol sin desayuna ta aumenta cada dia cu pasa y riba dje aumento di schoolgeld, a baha electricidad cu solamente 7% mientras despues di a subie cu casi 30%. Tur caminda tin aumento mientras menos den cartera di nos pueblo.
Aruba ta den un crisis financiero pisa pa malgastamento di placa. E gobierno incapacita aki a malgasta mas cu 2 biyon florin y a crea un supermega debe di mas cu 6.3 biyon florin. Si pueblo sigui vota pa partidonan MEP y AVP nos debe nacional lo surpasa 7 biyon florin aki un par di aña. For di gobernacion di partido MEP na aña 2001 bin a riba a viola articulo 29 di nos Statuut y tambe nos ley di compatibilidad pa fia traves di e banconan local placa den exterior riba un interes di casi 6%. Aruba su debe nacional ta mas o menos 143% di nos GDP.
Tanto gobierno di partido MEP y AVP a uza nos companianan estatal, propiedad di pueblo y otro institucion di gobierno como garantia of miho bisa a hipoteca nan pa a haci prestamo den exterior. Traves di intermediario a fia placa pa Aruba y companianan estatal. Si dia di mañan gobierno no por cumpli pa paga su debe lo bende tanto WEB, Elmar y otro institucion pa paga debe. E consecuencia lo bay ta pa e trahadonan di e companianan aki cu den futuro lo perde nan pan di cada dia. E situacion ta hopi mas serio cu pueblo ta kere. Nos futuro generacion tin un debe astronomico ta colga riba nan cabes. Si for awor caba Aruba su situacion financiero ta malisimo anto despues di 2027 Aruba su situacion lo empeora paso locual cu nos gobierno den ultimo 20 aña a haci ta schuif e debenan astronomico pa futuro. For di dia cu gobierno a elimina e spaarfonds nos problema financiero a bira pio.
Ni partido MEP ni partido AVP lo por bay cambia futuro di nos situacion financiero paso tur 2 partidonan aki a tapa pa otro y hiba Aruba den e abismo cu nos pueblo ta bibando. Si no tabata tin malgastamento lo no tabata tin mester tanto medida asina paso cu e 24 biyon di florin nos tur lo a biba manera un rey y placa lo a yega te sobra. Lastimamente nos tin parlamentarionan cu en bes di a sali na vanguardia di nos pueblo a apoya nos gobiernonan den malgastamento di placa di pueblo. Partido CURPA ta kere cu e gobierno aki su dia ta conta paso nan a sembra biento y pronto e horcan lo pasa den Cocolishi. Si tin un cos cu Dios ta odia ta inhusticia. Husticia ta di Dios. Ora e husticia yega, nos pueblo lo bay ta alegre. Nos ta biba cu e speransa y cu fe den Dios nos lo mir’e. Partido CURPA ta e unico alternativa.
