Kico e ta y con e ta wordo uza?
Anticonceptivo di emergencia, hopi biaha referi como e “morning-after pill”, ta keda un remedi vital den salud reproductivo, ofreciendo hende un di dos oportunidad pa preveni embarasonan cu no ta desea despues di relacion sexual sin proteccion of fayo anticonceptivo. A pesar di su disponibilidad, ainda tin concepto eroneo y stigma causando dificultad di comprension tocante su efectividad.
Prome cu tur cos, ta crucial pa desmenti e mito cu e morning-after pill ta sinonimo na aborto. Na contrario di aborto, cu ta termina un embaraso estableci, e morning-after pill ta preveni embaraso of inhibi ovulacion, fertilisacion of implantacion. Esaki ta actua como un medida di prevencion, no como un metodo di aborto.
Aunke e por ta efectivo den preveni embaraso si tuma esaki lihe despues di relacion sexual sin proteccion, su intencion no ta pa uza como un metodo primario di anticonceptivo.
Pakico?
E morning-after pill no ta mesun efectivo manera otro formanan di anticonceptivo, manera Microgynon, condom of anticonceptivo intrauterino (IUD). Uzando e morning-after pill como un metodo regular di anticonceptivo por tin un riesgo mas halto di un embaraso no desea compara cu uzando otro metodonan di anticonceptivo.
Uzando e morning-after pill frecuentemente por hisa e chens di experencia efectonan secundario fastioso, manera sacamento y malestar, pero tambe cambionan den e ciclo menstrual.
Aunke e morning-after pill ta safe pa uza ocasionalmente, su efectonan riba e salud na momento di uzo largo no ta conoci. No ta conoci si uzando e morning-after pill frecuentemente por tin implicacion riba fertilidad y e salud reproductivo en general.
Ademas, tempo ta clave ora di uza e morning-after pill, mirando cu su efectividad ta basa riba e orario di tuma esaki despues di relacion sexual sin proteccion. E morning-after pill mas comun ta esun cu ta contene levonogestrel (Postinor). Esakinan ta disponibel sin receta na botica, pero ta funciona miho si tuma esaki dentro di 72 ora (3 dia) despues di tin relacion sexual sin proteccion. Tambe ta importante pa sa cu e remedi aki ta traha door di blokeo di ovulacion, si tuma esaki despues cu ovulacion a sosode caba, e remedi no ta mesun efectivo.
E morning-after pill ta un remedi cu ta yuda un persona plania su futuro ora cosnan no bay manera plania. Pero ta importante pa corda cu esaki no ta reemplasa otro metodonan mas efectivo y por tin consecuencia nan pa un hende su bienestar si uza esaki frecuentemente. Tambe ta importante pa sa, cu e no ta preveni infeccionnan sexualmente transmiti, pa esaki semper un condom ta mas efectivo. Y manera semper: pa cualkier conseho personalisa tocante esaki, por tuma contacto cu nos!
P.s. Nos ta den luna di cambio di botica! Pa mas informacion por bay riba nos website www.boticadiservicio.com!
