Despues di a reuni cu Ministerraad y atende cu e asuntonan tecnico di e edificio nobo, a informa e sindicatonan cu e merger entre SPO Santa Cruz y Brazil no ta sigui. A bin acerca algun punto di e asuntonan tecnico di e edificio cu a inventarisa.
Ta bay pidi minister di Infrastructura pa e apunta un hende, pa hunto cu esun encarga cu ley di ARBO y circunstancianan di trabao y hunto ta bay traha riba e asuntonan tecnico cu por tin. No por a imagina un edificio nobo asina y no ta cumpli cu mester a cumpli cun’e.
Ta bay traha riba esaki den vakantie, pa esaki ta coregi y scol por cuminsa ohala cu tur esaki coregi. Awor aki tur cos ta keda manera e ta. Ta bay tuma tempo pa mira ta kico kier y si mester bin cambio den esaki. Loke si ta urgente ta e edficio na Brazil cu tin mankement na dje.
Magali Brito di SEPPA, a splica cu Minister Lampe mester por tabata tey den ministerraad. Mainta tabata tin di compronde cu ta Minister Lampe lo a bin pa duna un contesta. Pero despues e rumbo a cambia. A yega na Bestuurskantoor y si e no a make it mes, importante cu e trahadonan a bin tuma un decision di Prome Minister y tabata dispuesto pa baha y comunica su mes. Awe tardi ainda tin un reunion riba Trai Merdia y a pidi Prome Minister tambe pa por clarifica kico ta bay sosode cu MDC.
Pa loke ta SIMAR, Josephine Martilia-Albertus, awo e mayornan por bay cu vakantie den trankilidad, mirando tambe cu e docentenan tin enseñansa na pecho, nan yiunan na pecho, cu nan a bringa pa percura pa e yiunan por haya un enseñansa di calidad. Esaki sigur tabata un esfuerso hopi grandi pa yega na e decision aki. Martilia-Albertus a comenta cu e docentenan a persevera, cu nan a bisa cu NO, esaki no por y kier un enseñansa di calidad na Aruba. Ta sigui bringa y lucha, no pa nan mes so, pero pa e muchanan tambe. Esey ta mustra tambe cu e docentenan tin e enseñansa na pecho y en particular e muchanan. Nan mes a bisa cu loke ta pasando awor aki no por y ta contento toch cu a dicidi pa duna nan un oido, scucha nan y cu awor aki tin chens cu tur cos ta riba un paro. Otro aña escolar nan por cuminsa rustig y despues hunto cu Gobierno sinta wak unda kier yega y con ta yeg’e hunto.
Si bo no ta para tras di algo y no ta contento cu algo, mester por vocifera esey. Ta contento pa mira c den union, bo ta logra. E docentenan a uni hunto bisa cu no, esaki no por. Nan no ta acepta esaki. Esey a buta cu nan a haya oido y a bin un cambio pa nan y tambe pa enseñansa y pa Aruba. Miembronan a pone confiansa den e sindicatonan y expresa cu loke tabata sosode no tabata por. A purba di sostene na unda cu por y yuda nan cana e caminda cu mester. Awo door di haci esey, nan a haya un logro hopi grandi cu otro aña nan ta cuminsa nan aña escolar rustig y cu nan por bay vakantie awor aki riba un rust, descansa pa cuminsa otro aña.
