Djarason e Belga kurasoleño Guy Cozijns a presentá un manera chistoso riba e terasa di Foodies na Caracasbaaiweg su buki ‘De Rode Duivels – wij worden wereldkampioen’ na un un grupo selekto di invitado.
Vários di nan tabata bistí na e koló kòrá di e selekshon nashonal di Bèlgika pa demostrá for di awor nan sosten durante e próksimo kameonato mundial na Rusia.
Bistí na unifòrm real di un rèfri (asistente) di FIFA Frans Heiligers a guia e papiamentu informal kaminda el a envolví diferente di e wéspetnan. Entre nan promé minister Eugene Rhuggenaath, e kònsel di Bèlgika na Kòrsou Jan van Belleghem, doño di Foodies Patricia Brunswijk i diferente hungadí di e klup De Juristen i otronan. Aki-aya a saka karchi tambe.
Ta trata di un buki masha fásil pa lesa ku pinturanan prèt – kaminda ta wak bèk riba pasado, pero ku aksento riba e aktualidat i kon grandi e chènsnan ta pa e Belganan sorprendé mundu ora dia 15 di yüli awor nan hunga e wega final na Moskú. 
E soño di Guy Cozijns ta, manera el a deskribí den e buki, pa e kapitan Vincent Kompany ku un bala di kòp den di 118 minüt di wega ta duna e Belganan e trofeo – den un wega final kontra Brazil òf Fransia ku ta kaba 4-3 pa e onsena Belga. Esaki segun Cozijns mester ta alkansabel si e profeshonalnan Belga demostrá sufisiente grinta (esei ta Italiano pa un ánimo inmenso sin baha kabes) den e shete weganan te i ku e wega final. Pa yuda drenta e ambiente kaba e empresa Leañez & Co a suministrá nan kaha di serbes Stella Artois for di Bèlgika. Parti di e rekoudashon di e buki aki e outor ta destiná pa Duchenne Parent Project Belgium i un bon amiga na Bèlgika ku ta lucha ku gastu haltu pa duna su yu Jimmy ku ta yen di energia e kuido adekuá pasobra e ta sufri di e malesa di múskulo Duchenne. E siman aki e buki a bini di prensa i den e dianan binidero lo e ta optenibel na kantidat mas grandi.
