Den oranan di awe merdia tabata tin un acumulacion di persona na Zeerovers na Savaneta. Hopi tabata puntra kico por tabata e motibo.
Eynan a constata cu tabata famia y amigonan di e piscado desapareci Pau Martijn tabata eynan, despues cu nan a ricibi informacion cu e curpa di Pau a wordo haya na costa di Venezuela, na un bario hopi remoto cu ta keda entre e frontera di Colombia y Venezuela.
Team di 24ora.com a bay na e sitio y a combersa cu amigonan y famia kendenan a duna informacion di loke nan a ricibi for di canalnan cu despues nan a confirma, inclusive na minister di husticia, cu e curpa di Pau a wordo haya.
Esaki a trece un tristesa hopi grandi bao di famia, kendenan tabata tin speransa. Sinembargo e noticia aki a wordo anuncia door di famia y amigonan, bao di cierto duda, cierto desinformacion pa motibo cu no tabata haya ningun dato concreto di loke ta e descubrimento di e curpa aki, un noticia oficial of un confirmacion oficial for di autoridadnan concerni.
24ora.com a tuma contacto cu diferente colega di prensa na Colombia y ningun tabata na altura cu un curpa a wordo haya. Hasta ta papia cu tin tres piscado Colombiano tambe desapareci pa un siman caba, cu tambe tin buskeda pa nan.
Finalmente den oranan di merdia pa atardi, dado momento por a haya e informacion cu por a mira cu tur hende a cuminsa desaparece na careda for di Zeerovers. Ora cu a busca informacion nan ta menciona cu no tin ningun confirmacion cu un curpa a wordo haya y ni si ta un curpa di e piscado Pau Martijn.
Nos a sigui busca informacion. E coleganan te cu oranan di anochi no a haya ningun confirmacion Y ultimo aki nos a hasta tuma contacto cu prensa, e relacionista publico di Armada Nacional di Colombia, kendenan a bisa cu nan no tin ningun confirmacion cu un curpa a wordo haya. Si nan tin informacion cu tin buskeda andando y cu nan a bisa cu asina cu esaki ta e caso nan lo tuma contacto cu 24ora.com pa haya e version oficial cu un curpa a wordo haya of no.
