Ayera nochi pa 8:45 pm e avion N-151SD cu ta bula bou di e nomber di “Mayweather” a aterisa na aeropuerto internacional Reina Beatrix. Den dje el a trece un famia di mas of menos 10 pasahero, entre nan e boxdo profesional, Floyd Mayweather. E private jet marca Gulfstream modelo G650, balora na mas di 60 miyon dollar y cu ta bula 1050 km pa ora, tabata regalo pa e boxdo ora el a cumpli 41 aña di edad.
Floyd Joy Mayweather Jr., naci como Floyd Joy Sinclair, dia 24 di februari 1977, ta un ex-boxdo profesional. El a competi entre aña 1996 y 2015, pero a bin bek pa un pelea na 2017. Durante su carera el a gana diescinco titulo mundial, inclui e renchi den cinco categoria di peso, e campeonatonan den cuater categoria di peso (dos welterweight) y a retira cu un record invicto. Como un amateur, el a gana medaya di brons den division di featherweight den weganan olimpico di aña 1996, tres campeonato di US Golden Gloves (light flyweight y featherweight) y campeonato nacional di Merca den featherweight.
Unda e boxdo lo hospeda na Aruba no ta conoci ni tampoco relevante. E hecho cu el a scoge Aruba y a yega aki cu su famia, sin mucho siguridad y ta sintie pa cana liber y trankil, ya ta motibo di orguyoso pa nos tur. Nos ta desee un estadia placentero. Tene cuenta cu cada mencion cu e haci riba su paginanan di red social, lo yega na por lo menos 24 miyon hende rond mundo, un promocion cu siguramente nos ta desea den e momentonan aki. Pa un cobertura completo, lesa bo edicion di TREMPAN awe.
