“Nos ta sigui kere den nos economia, pasobra si nos no kere aden, ken si lo kere den dje?”, asina Eddie de Veer, director di MetaCorp a bisa relaciona cu un inversion grandi den EcoGas, situa na Barcadera banda di e facilidadnan di ATCO Concrete. E compania a inverti riba 6 miyon florin pa adkiri tres tanki di gas grandi pa por abastece comercio di nos isla cu gas pa.
E inversion aki ta mara na hisa e capacidad di EcoGas pa suministra e mercado comercial local cu gas. Cada tanki ta di 120 mil galon, pues den un solo inversion awor a aumenta nan capacidad existente cu 360 mil galon. E tankinan ta grandi. Nan ta midi 45 meter di largura y cada un ta pisa 85 ton. EcoGas tabata dispone di solamente dos tanki chikito di 30 mil galon cada un, pues cu e adkisicion nobo, awo nan capacidad a aumenta na 420 mil galon di gas.
Separa di e tankinan, mester bisa cu e inversion ta mara tambe na tur e tuberianan cu ta bin conecta na e tankinan, instrumentonan necesario y un truck extra cu ta na caminda. Ta hunto e ta surpass 6 miyon florin. Parti di e gastonan ta cu mester cumpli cu hopi norma internacional. Pa por instala e tankinan, por ehempel e trabou di welder, mester sosode cu welderdo profesional y certifica pa haci esey. EcoGas tin hendenan di afo cu ta asisti nan pa haci e proyecto exitoso.
No ta tur trabou a sosode cu ayudo internacional, pasobra por ehempel e transporte estilo “heavy lifting” tabata den man di ATCO Aruba. Nan tabata encarga pa transporta e tankinan for di e barco, crusa riba waf di Barcadera y bay instala nan riba e fundeshi cu a traha cla adelanta pa nan. A uza varios contratista local den e proyecto grandi aki. Ainda no ta completamente cla cu e trabounan.
E preparacion p’e tereno unda ta pone e tankinan a cuminsa desde december aña pasa. Pa transporta e tres tankinan aki di waf pa nan luga tabata un trabou grandi cu a rekeri masha hopi preparacion. Pa transporta un tanki di e magnitud aki no ta nada facil. George de Nobrega, gerente general di EcoGas, a splica cu door di e peso cu e tankinan tin, mester tin un bon fundeshi. Cada fundeshi a hiba casi 150 cube di beton. Esey ta nifca cu e ta un fundeshi basta grandi pa mantene e peso di e tankinan aki.
Tocante EcoGas
Ecogas a bira un realidad den aña 2018. Nan a establece riba un terreno banda di ATCO Concrete na Barcadera. Meta di e compania nobo aki ta pa maneha gas comercial na restaurantnan, hotel, laundry y tur otro negoshi cu ta rekeri gas pa nan por opera. Claro cu e compania ta percura pa mas cupo di trabou. Si tur cos ta bon, e tankinan lo ta instala y cla pa opera na fin di juni proximo.
