Despues di a manda e Director di Directie Volksgezondheid Aruba (DVG), Drs. Jerry Staring cas pa investigacion, Minister Dangui Oduber a anuncia mesora cu lo institui un “Management Team” temporario pa guia e departamento mientras ta investigando e kehonan cu personal tin contra Staring. A keda di anuncia e team dialuna pero a dura te cu diabierna pa e mandatario por a caba di haya aprobacion di Conseho di Minister pa apunta dos persona, un di e departamento mes y e otro un abogado, pa ta na timon di DVG. Ta trata aki di e conocido abogado mr. Sven Faarup y Joan van Heyningen, un Jeugd Arts, hefe suplente di Jeugd Gezondheid Zorg (JGZ) na DVG.
Mester menciona cu e empleadonan di GKMB tin simannan purbando pa haya un audiencia cu Minister Dangui Oduber pa repasa cune un lista di malcontento den e departamento pero no ta logrando. Awe e mandatario a bay personalmente na DVG pa anuncia e cambionan y pa cera e empleadonan conoci cu e Management Team nobo. Lamentablemente e no a invita e trahadonan di GKMB, locual awor ta percurando pa mas malcontento y escalacion entre e empleadonan.
DVG ta net den un era nobo, cu cambio di cultura y introduccion di un vision y mision cu tur empleado ta reconoce y ta dispuesto pa ehecuta. Ta varios cambio y progreso tabatin den e ultimo añanan caba. Documentonan oficial den archivo di Gobierno di Aruba ta mustra cu for di aña 1917 tin un movemento riba un departamento pa maneha asuntonan di salud publico na Aruba, pues DVG of DESPA a celebra 100 aña di existencia aña pasa! Na 1917 a trece un curpa morto for di Corsou pa Aruba y asina a realisa cu mester di un maneho con ta atende cu situacionnan asina. Ta di eynan a crea un “Kinderarts Besluit” pa vacuna muchanan y tambe a nace e “Higienische Dienst” den unda a cuminsa educa comunidad riba labamento di man y cuminsa introduci reglanan pa negoshinan cu tabata bende alimento.
Pa straño cu por zona, e departamento a funciona pa casi 100 aña sin un “instelling besluit”. Comosifuera poco, nunca a traha un “formatieplan” tampoco, den unda ta stipula y ta discribi cada 1 di e 82 funcionnan den e departamento. Tampoco den e casi 100 añanan no a prepara nunca un “Personeelhandboek” den unda ta stipula e reglanan cu trahadonan mester tene nan mes na dje, ni un “Verzuim Reglement”, “Ziekteverzuim Beleid”, “Visiedocument” of tampoco un “Strategisch Plan”. Bisando esaki, ta hopi trabou, hopi investigacion, deliberacion, dialogo y inversion di tempo a bay den preparacion di tur e rapportnan, maneho y vision pa DVG.
Cu e era nobo den Directie Volksgezondheid Aruba, a haci posibel pa cambia e cultura di un “Uitvoerende Dienst” pa un “Beleids Directie”. DVG tin como meta pa fungi como e parti central den cuido na Aruba, conectando tur otro stakeholdernan. E departamento ta demostra profesionalismo, dinamismo y etica halto den tur trabou cu nan ta desplega.
Directie Volksgezondheid ta situa den Caya Ing. Roland Lacle, parti den 6 edificio banda di otro y 2 otro edificio situa na Barcadera, unda tin Servicio Veterinario y GKMB. Na tur e departamento ta conta cu 160 empleado bon prepara y capaz pa sigui desaroya e organisacion pa implementa y ehecuta maneho riba tereno di salud publico na nos isla.
