Awe den oranan di atardi a drenta diferente yamada cu a surgi un problema di higiena na Save More pa cual autoridadnan concerni a dicidi di cera e establecimento aki.
Personanan cu a yega na e negoshi aki, situa na Shaba (Noord) a haya e luga completamente cera y riba e porta tin un papel pega cu ta bisa “nos ta cera pa motibonan tecnico”.
Sinembargo na momento cu a bay haci e investigacion necesario, a haya confirmacion cu a cera e luga riba ordo di Departamento di Salud Publico. E informacion ricibi for di un fuente ta bisa cu DVG ta haci su trabounan continuamente y esnan cu no cumpli cu regla di higiena of no ta cumpli cu ley e.o cu certificado di salud of otro articulonan den ley lo wordo cera.
Na final a haya confirmacion for di DVG cu a cera e luga debi na presencia di schimmel, no por a haya informacion si ta riba producto of riba shelf, of den freezer.
Inmediatamente despues di a cera e luga, a pone e empleadonan cuminsa un limpiesa grandi.
Den e caso di Save More a tuma contacto cu Marcel Celaire, un manager di e establecimento, kende a bisa solamente cu nan a cera e luga pa motibo tecnico. Na momento cu a puntr’e pa comentario, no kier a duna reaccion y ora cu a puntr’e si a cer’e pa motibonan di higiena, e supervisor aki a cera telefon di nos reportero.
Por a compronde for di siman pasa caba un team a subi caya pa haci control narestaurantnan Chines y varios tabatin persona trahando sin permiso of sin e carchi berde pa cual a duna ordo pa cumpli cu e ley.
