Polisnan a bay pura na Paramira diadomingo merdia. A drenta informacion cu tin un pelea formal andando riba caya. E prome unidad di Polis cu a yega a topa un homber herida cu sla serio na un wowo cu tabata sangra. A tende di testigonan cu den dos diferente auto e sospechosonan a huy.
Un Hyundai preto y otro auto shinishi. A sali mesora riba caya y ta bin topa cu e Accent banda di un rotonde riba e caminda di Tanki Leendert prome cu Cas Casuela. A topa un homber y un dama. Despues di mas informacion acumula a detene ambos. A prepara pa hiba nan warda den un solo transporte y na boei. Prome cu esey mester rista ambos. Den e ristamento a bin haya riba e dama un suma di alrededor 23 mil dollar bon scondi.
Suficiente motibo pa separa e dos sospechosonan di otro. A activa Afpak Team mesora. Den un auto separa a hiba e dama warda di polis. Awor nan mester duna cuenta pa e maltrato serio y tambe pa e suma grandi di placa na dollar. Mester mustra di e placa ta un placa procedente di un actividad limpi. E victima a bay Hospital y a keda di entrega keho. No ta conoci kico a sosode cu a bin den grupo di seis pa bati e homber na Paramira.
