Diadomingo marduga pa mas o menos 1:30am a tuma luga un control rutinario den trafico. Polis a instrui e auto marca Toyota modelo Yaris, color blanco, cu number A-62220 pa e para. Esaki a sosode dilanti edificio di Aruba Airlines na Cumana.
Comportacion nervioso di e dama chauffeur a haci cu Polis a haci un investigacion riguroso den e auto. Un patruya cu varios Polis den dje a revisa bahul, bou di sientanan, den lacho, dashboard, etc. E buskeda no a resulta envano.
A canta “Bingo” den nan esfuerso pa busca pa substancianan ilegal, ora cu na un dado momento Polis a topa cu varios sakito di Cocaina y pildernan di Ecstasy (MDMA).
Relaciona cu nos ley di droga, Polis a bay over na detencion di e señora y a transporte mesora pa Warda di Polis unda a presente dilanti un Sub Fiscal pa dicidi riba su encarcelacion y investigacion mas profundo.
