Departamento di Obra Publico (DOW) ta informa cu entrante 1 di juli 2018, e departamento di Maneho y Supervision lo aumenta control riba construccionnan ilegal, tanto construccion di vivienda como tambe construccion di edificio comercial. Na Aruba tin mas y mas construccion ilegal ta tumando luga.
Si bo ta construiendo sin permiso di construccion of e construccion a desvia di e permiso, e ora bo tin un construccion ilegal! Tambe si bo persona a cumpra un parcela cu tin un construccion riba dje, tambe ta ilegal si a construi e den pasado sin permiso.
Si bo persona no ta sigur si bo vivienda of edificio comercial ta legal, semper por pidi na nos balie di Supervision, informacion tocante e permiso y haya un copia. Den principio construccionnan ilegal mester a wordo basha abou of mester wordo legalisa. Legalisa ta posibel si bo persona pidi pa un permiso di construccion y e construccion ta cumpli cu e reglanan concerni of e construccion por wordo adapta na e reglanan.
Si DOW bin controla y bo tin un construccion ilegal, bo lo haya un carta cu bo persona tin 14 dia pa entrega un peticion pa un permiso di construccion of basha e construccion ilegal abou. Si bo no uza e oportunidad aki, bo por haya 14 dia mas si bo tin un argumento valido pa no a cumpli, sino DOW lo desmantela e construccion riba bo risico y propio cuenta.
Pa pidi pa un permiso di construccion bo mester tin e siguiente rekisitonan:
Rekisito pa mapa cas
• Mapa di cas (bestektekening), 2 copia;
• Mapa di plan di ubicacion, (situatietekening) 1:1000 of 1:2000, 2 copia;
• Mapa di hero (constructie-tekening) 1:20 y nan calculo (constructie-berekening), 2 copia;
• Acto di notario, optierecht of un decreto ministerial di e tereno, 1 copia;
• Un prueba legal di identidad;
• Yena un formulario di DOW pa un permiso di construccion (bouwaanvraag), 1 copia;
• Afls. 200,- di retributie.
Rekisito pa edificio comercial
• Mapa di edificio (bestektekening) 1:100, 4 copia;
• Mapa di plan di ubicacion, (situatietekening) 1:1000 of 1:2000, 4 copia;
• Mapa di hero (constructie-tekening) 1:20 y nan calculo (constructie-berekening), 2 copia;
• Acto di notario, optierecht of un decreto ministerial di e tereno, 1 copia;
• Un prueba legal di identidad;
• Yena un formulario di DOW pa un permiso di construccion (bouwaanvraag), 1 copia;
• Formulario di D.T.I. yena;
• Afls. 200,- di retributie.
Ta spera cu por a informa tur persona e pasonan necesario ora di entrega un peticion pa construi sea ta pa vivienda of edificio comercial.
