E situacion di barnan na San Nicolas no ta cos di canta macamba, manera e dicho ta bisa. Mientras cu e propietarionan ta trata di mantene nan mes na regla, sufriendo e consecuencianan financiero, por nota cu tin un discriminacion.
Barnan rond di Aruba ta habri y hasta tin cantidad di barnan ilegal, tin biaha den cara di polis, unda prostitucion ta tuma luga. Hasta Chinesnan a cuminsa huur camber.
Jose da Silva, propietario di G-Spot den combersacion cu 24ora.com, a splica e dolor cu nan ta pasa aden, pa cumpli cu nan obligacionnan financiero, cu no ta sosode completamente. Nan tin un aña cera sin por haci nada. Ta para mira con poco poco nan negoshi ta bin abou, simplemente pa keda mantene nan mes na ley, mientras cu otronan no ta haci esey.
E situacion di prostitucion ilegal a pone cu hasta muhenan Arubiano a drenta e negoshi pa cual e ta lansa un advertencia na mayornan pa djis subi e sitenan di prostitucion na Aruba pa mira si no ta topa cu potret di nan yiu. Ta hopi Arubiano tin meti awo den e negoshi aki.
Da Silva su gastonan pa luna ta hopi halto, mientras cu su unico entrada ta FASE. E situacion ta preta asina hopi, cu si un Arubiano bin huur un camber cerca dje, e ta hacie, pa yuda cubri su gastonan, aunke e no ta logra ni cu mita. Hasta cu banco e ta atrasa.
Nan a reuni y manda carta pa tanto minister Andin Bikker y prome minister tambe a haya un carta riba e situacion cu nan ta pasando aden. ““Gobierno mester duna tur hende e mesun chens y oportunidad,” da Silva a bisa.
Pa mas informacion, lesa edicion di TREMPAN.
