Den e aula di Universidad di Aruba a tuma luga e charla tocante ‘Diseases of the Inmune System on Aruba’. Orador n’e charla aki tabata dr. Zaheeb Choudry, internista-nefrologo, imunologo clinico y alergologo, en corto: specialista den e malesanan inmunologico.
E ta bek na Aruba despues di tabata na Hulanda, unda cu el a bay sigui un specialisacion mas den loke ta trata e malesanan inmunologico, pero tambe el a sigui un specialisacion den e alergianan. Segun Choudry, alergia y malesa di sistema inmunologico ta conecta cu otro.
Durante e charla dr. Choudry a amplia tocante su experiencia y tocante e malesanan inmunologico presente na Aruba, pero tambe e malesanan presente na Aruba cu tabata dificil pa reconoce. E publico presente tabata hopi interesa den ricibi mas informacion riba sistema inmunologico y kico mester haci pa haya un malesa cu ta ataca e sistema inmunologico.
LUPUS
Den e charla, dr. Choudry a profundisa su mes den e malesa Lupus. Lupus ta un malesa di e sistema inmunologico, cu ta ataca e cuero, e musculonan, riñon y tambe ta afecta demas organo. Un organo sano ta enemigo di e malesa Lupus. E por ta un malesa dificil pa trata, cu ta ataca e sistema inmunologico. E prome etapa di Lupus ta dolor articular y muscular. Hopi biaha e dolor ta na ambos banda di curpa n’e mesun tempo, specialmente den e joints di pols, man, dede- y rudianan. E jointsnan por parce di ta inflama y ta sinti cayente ora cu mishi cu ne. E ta un malesa cu por ta hopi fastioso cu ta presente no solamente na Aruba, pero tambe den e area di Caribe.
KEN TA ZAHEEB CHOUDRY
Zaheeb Choudry a nace dia 2 di mei 1985 na Amsterdam, Hulanda. E ta gradua di e Amsterdam Medical University. E ta specialisa como internista (malesa di e sistema interno/inmunologico), nefrologo (riñon), inmunologico clinico (malesa di e sistema inmunologico) y alergiologo (alergia). E actividadnan clinico y academico, ta un bon combinacion pa un profesional di salud trahando den e region Caribense y ta mantene e mente alerta. Ademas di cuido di pashent, e ta duna tayer tambe.
E ta biba na Aruba y ta duna cursonan di actualisacion na e profesionalnan di salud como tambe tayernan. E ta colabora cu e hospitalnan den Caribe Hulandes y Hulanda.
Na september ultimo, el a finalisa su specialisacion den inmunologia clinica y alergiologia na Amsterdam University Medical Center y tambe n’e Erasmus Medical Centrum Rotterdam
