Diabierna anochi a tuma luga e pre-lansamento di ‘Blue Lizzard Effect’, cu ta un serie documental riba Aruba, na Visitor Center di Parke Nacional Arikok. E serie aki ta produci entre e paisahenan di Aruba.
Jason Silva, anfitrion di ‘Blue Lizzard Effect’, a indica cu Aruba ta conoci pa e lagadishi blauw y e ta un simbolo di e isla. Silva ta kere cu lagadishi blauw ta encarna e spirito di resilencia y transformacion, di cual ta pone hende contento y Aruba ta e ‘Happy Island.’ E ta di pensamento cu a scoge e titulo di ‘Blue Lizzard’ (lagadishi blauw) pasobra e ta bunita y e ta conecta n’e lagadishi iconico cu ta nativo na Aruba.
Despues Silva a conecta cu Aruba Tourism Authority (A.T.A.) y Pacifista Film, kendenan a partner pa crea un serie di documentario cu lo transforma e forma con hende ta mira Aruba. Ta haci esey door di bay mas profundo di e reputacion di ta un ‘Happy Island’ y drenta den un combersacion mas grandi di loke ta significa di ta feliz den siglo 21.
Despues di Covid hende ta puntra nan mes kico ta haci nan feliz. Si e mundo por a bay den un pandemia, hende lo pensa cu felicidad no ta trabou of simplemente gana placa. Felicidad a famia, naturalesa, conexion, amor y hopi mas otro cos, haya bo pasion y esey ta crea un urgencia rond mundo, e crisis mental. Hende ta busca pa sa kico ta felicidad en realidad.
Felicidad
Hende ta prefera di ta biahero na luga di ta turista. Silva ta di pensamento cu biahamento ta un gran ehercicio den busca pa felicidad. Si hende ta busca pa biaha, e ora nan por bin Aruba. Nan bin Aruba, e ora nan por biaha cu depth y conecta cu hende, compromete cu e suheto di felicidad.
Kyra Hoevertsz, atleta di landamento sincronisa, a indica cu si e mester bisa un palabra di forma parti di documentario ta ‘orguyoso.’ Cualkier oportunidad cu e haya pa representa of haci algo pa Aruba, e ta haci esey. E ta haya cu esaki tabata un experencia diferente pa su persona, pasobra normalmente e ta bay competi y ta train den pool. Sinembargo, awo cu e mester a graba y hacie, esaki tabata un experencia unico p’e.
Entrevista uno diferente
E atleta a expresa cu di a gusta con tur cos tabata hinca den otro, e elemento di awa cual e ta esey. E ta orguyoso di esaki. Incluso e ta sumamente entusiasma pa e documentario aki sali dia 17 di april proximo. E ta kere cu e documentario lo ta uno exitoso. El a sinti cu su entrevista tabata uno diferente, pasobra normalmente esey no ta tipo di pregunta cu e ta haya. E ta haya cu e preguntanan aki a dun’e oportunidad pa pone pensa riba pakico e ta haci deporte, di ta tanto ora den awa. El a pasa den momento cu nan mester a simplemente stop, cut y cuminsa graba bek, mirando cu e mester a pensa un poco debi cu e preguntanan tabata un tiki duro.
Dangui Oduber, Minister di Turismo, a expresa di ta contento di por tabata presente na e pre-lansamento di e serie documentario ‘Blue Lizzard Effect.’ E documentario nobo aki tabata filma den e ultimo lunanan aki na Aruba cu protagonista local, nos propio Rubianonan cu un actor profesional di calidad sumamente halto. Aki ta bay mustra aspecto halto unda cu nos mesun localnan no sa cu nos tin esaki. E ta un documentario diferente y ta enfoca riba cuater tema, esta tera, aire, candela y awa.
Diabierna e invitadonan tabatin e privilegio di mira e prome tema cu tabata di awa. E documentario aki tabata di 20 minuut y cu esey ta bay mustra Aruba di un forma diferente. Ta haci esey door di mustra naturalesa, mustra recurso natural, e felicidad cu ta biba riba nos isla.
Trece turista nobo
E mandatario a sigui indica cu ta propaganda Aruba como ‘One Happy Island’ y por medio di e documentario ‘Blue Lizzard Effect’ ta bay mustra esey riba diferente plataforma renombra manera HBO. Dia 17 di april proximo lo bay tin cuater documentario lansa oficialmente. Esaki lo bay tin un impacto positivo pa Aruba su turismo. Tambe ta convenci cu lo trece turista nobo cu no conoce Aruba.
Nichole Danser, instructor di Scuba, ta un di e protagonistanan di e documentario ‘Blue Lizzard Effect.’ El a expresa cu e ta crece coral cu e hubentud local p’asina nan por pone esaki bek y asina ey ta restaura e rif bek.
E ta gusta con e proyecto aki ta mustra Aruba den un forma diferente. E ta enfoca riba hende y pakico Aruba ta asina feliz. P’e motibo ey Danser a haya esaki algo unico. Su parti den e programa tabata algo asombroso, pasobra aki por a mustra cu tin hende ta haci algo pa proteha lama, pa restaura lama, y realmente ta purba di preserva loke tin pa hacie miho.
Danser a expresa cu mester proteha e awa y mester haci mas pa e actividadnan cu hende ta haci den awa ta recordatorio riba ki e impacto nan tin p’e rifnan, turtuga. Nan ta eynan pa hende disfruta, pero mester proteha nan door di mustra respet pa por haya esaki.
