Vivienda pa nos pueblo ta un prioridad. Asina mr. Geoffrey Wever, Minister di Asuntonan Economico a duna di conoce. E desaroyo di locual ta AirBnb’s ta haci dificil pa hende local yega na un cas, prijs ta keda subi anto e mercado ta un tiki preta aworaki pa haya casnan actual.
Riba dje DIP (Departamento di Infrastructura Publico) no ta sacando tereno, FCCA tin 3,700 persona riba lista di espera, anualmente por presupuesta pa yuda 70 hende financia nan cas, e ta mustra cu bo mesun hogar no ta un cos alcansabel sigur p’e hoben profesional.
E ta un preocupacion, segun Minister Wever dus riba e demanda cu tin riba e mercado di Real Estate na Aruba, hopi cas ta cumpra pa hende cu no ta di Aruba y converti esaki den AirBnb. Ora bo tin un aanbod limita di casnan y bo demanda ta halto, mas Rubiano mester nan propio hogar, bo ta en realidad limitando e mercado door cu un grupo ta cumpra y pon’e pa Vacation Rental. E ora ey bo ta haya aumento di prijs automatico. “Anto esey no ta den beneficio di e Rubiano. P’e motibo ey, nos a haci nos investigacionnan y nos ta kedando cla cu e parti di regulacion cu nos ta kere mester ta na su luga.”
Regulacion manera nos ta mira por ehempel na Hulanda, unda cierto bario ta protegi y no facilmente por bende nan na hende cu facilmente lo uza nan pa tereno AirBnb, ta e pregunta cu nos a haci e mandatario. Minister Wever: “Nos ta bezig cu esaki y ora e ta cla mi lo haci e anuncio. Mi ta kere nos mester percura pa tin bon balans. Nos tin cu corda cu nos casnan ta pa nos hendenan biba aden tambe, y cas mester ta pagabel pa tur Rubiano. No solamente pa un grupito. Dus ta algo cu tin nos preocupacion.”
