Den cuadro di varios reto y dificultad cu ta biba entre nos hobennan pa loke ta nan identidad – cu aparte di ta e base general den bida – ta refleha den nan enseñansa, Docente y Desaroyado di Identidad y Talento Certifica, Sra. Sharleen Tromp recientemente a duna un lectura na e maestronan di Ibero American High School, San Nicolas.
Tipo di personalidad
“E necesidad a bin ora cu mi a ripara cu mi ta tratando cu diferente tipo di personalidad den klas y normalmente bo mes, como docente, tambe ta siña for di bo mesun personalidad. E materia aki ta parti di loke nos ta yama, “klassenmanagement” con pa mi trata y crea un atmosfera den klas unda tur studiante primeramente ta compronde nan mes y otro. Kiermen cu nan ta diferente y toch nan ta unico. Esaki ta parti di ‘diversificacon y inclusion.’ E tin di haci tambe cu mi manera di duna les; con ami como docente, ta bay tene cuenta cu cada tipo di personalidad.”
Pasobra e meta mayor di docente ta pa logra prepara y ekipa e studiantenan lo miho posibel, surpasando tur barera y coriente contrario di e hoben su tipo di personalidad, cu por strob’e di conecta, ricibi y crece. Strategianan cu ta vence por ehempel, falta di atencion, falta di concentracion, falta di interes na un tema of direccion specifico y tur otro componente cu no ta cay den e grupo di puntonan fuerte di nan tipo di personalidad.
“Mi acercamento mester ta diferente, hasta den trahamento di ‘proefwerk,’ dunamento di tarea den klas, etc. E meta ta pa conecta cu cada studiante y yuda nan desaroya segun nan personalidad. Den e cuadro aki e lectura na e maestronan di Ibero American High School a tuma luga.”
Maestronan ta haya nan mes enfrenta cu varios reto y durante e lectura varios maestro a indica esakinan. Manera entre otro, dificultad pa logra haya atencion di cierto studiante, studiantenan tin un actitud dificil pa trata cu ne, uno desaroya for di cas caba, mester un strategia diferente den nan acercamento pa por cumpli miho cu e necesidad di cada studiante; logra haya un balans den e diferente tipo di personalidad; sa kico pa bisa un mucha y con pa identifica comportacion y personalidad.
Despues di a tuma e lectura, docentenan a indica di por relata cu cierto reto y scenario menciona y cu nan ta sinti nan mes miho capacita pa identifica e tipo di personalidad cu nan tin nan dilanti; nan por a reconoce varios comportacion di cierto tipo di studiante y con pa atende cu esaki; tambe di a siña tocante nan mesun estilo y con pa acerca otronan di un manera diferente; di a haya un herment nobo acerca pa construi relacionnan; cu nan metodo di enseñansa mester diversifica; di a bira consciente di e studiante nan retonan y posibel solucionnan pa yuda nan conecta miho; di conoce y compronde nan mes como docente; di bira mas consciente cu nan propio coleganan y studiantenan den klas; di lo yuda nan traha riba nan mes como docente, mama y amiga.
