Diabierna ultimo, den presencia di su casa Lieneke Koopmans, e docente na Colegio Arubano, Willem Bant di 54 aña di edad, a obtene su diploma “Licenciado en Literatura y Lengua Castellana” Cum Laude for di Universidad Santo Tomás na Bogotá despues di studia 10 aña. Hunto cu Bant a gradua mas di 100 studiante, aunke no den e mes carrera, casi tur hopi mas hoben cune, hendenan cu por ta su yiu. Cu e diploma aki, Willem Bant a logra nada menos cu tres diploma di tres diferente institucion academico na tres diferente pais!
Willem Bant a asisti klasnan 5 y 6 na Mon Plaisir, 1 y 2 na Colegio Arubano prome cu el a bolbe Hulanda pa despues gradua di RSG West-Friesland na Hoorn. Willem Bant a studia na Universiteit van Amsterdam unda el a obtene su prome diploma “Nederlandse Taal- en Letterkunde” y cu esaki el a obtene “eerstegraads lesbevoegdheid”, competencia pa duna les di Hulandes den prome grado. Esaki ta e maximo competencia pa scolnan MO.
Siguiendo pasonan di su tata, Klaas Bant, kende a duna les na Colegio Arubano di 1974 te cu 1977, Willem Bant a bin Aruba como docente di Hulandes na e mes Colegio. Willem Bant, mescos cu su señora Lieneke Koopmans, a nace na Hulanda, pero nan ta Arubiano di curason. Nan dos yiunan, Klaas (yama pa su welo) y Jan si ta Arubiano di nacemento. E mayornan di Willem aña pasa a ricibi di Aruba Tourism Authority (ATA) e reconocemento “Goodwill Ambassador” pa e 20 añanan consecutivo cu nan ta bishita Aruba. Berdaderamente henter e famia ta stima Aruba.
Mientras e tabata docente na Colegio Arubano, na 1998 Willem Bant a ricibi di Instituto Pedagogico Arubano (IPA) e diploma “3e Graads Lerarenopleiding Spaans” despues di sigui un curso di tres aña durante su oranan liber. Entre e docentenan di e tempo ey tabata Roy Croes, Lydia Kock y Ramon Todd Dandaré. Cu e diploma aki, Willem Bant por a cuminsa duna les di Spaño den e klasnan mas abou.
Na aña 2000 Willem Bant a bolbe Hulanda y aya ela sigui e cursonan necesario pa obtene e diploma “2e Graads Lerarenopleiding Spaans” for di Hogeschool van Utrecht. E siguiente aña el a bolbe Aruba.
Willem Bant no tabatin ningun incentivo financiero pa studia mas pasobra cu su diploma “Drs. Nederlands Bevoegdheid 1ste Graad” su salario ya tabata den e scala maximo pa duna les na un scol MO. Pero e tabatin un soño, un deseo pa siña mas. E tabata sinti un rancamento den su alma cu a convence di cuminsa un estudio di literatura Spaño. El a investiga varios opcion pa sigui su estudio y al final el a dicidi cu e “carreranan” di Universidad Santo Tomás via internet tabata mas conveniente p’e. Santo Tomás ta e universidad mas bieu di Colombia y tin un trayectoria glorioso. E ta ofrece les “a distancia” (via internet) of “en persona” (den su aulanan na Bogotá).
Esnan cu ta sigui e carreranan “en persona” normalmenta ta caba den 5 aña. Como studiante “a distancia” Willem Bant a sigui e carreranan di Universidad Santo Tomás pa Internet e siguiente 10 añanan! Mas di 50 vak cu un total di mas di 150 credits! E carrera no tabata encera solamente e idioma Spaño, pero tabata cubri historia, geografia y cultura di Colombia. Willem Bant no sa cuanto e por a gasta pa yega na su diploma, pero e ta enfatiza cu e experiencia ta bal tur placa cu el a uza. Bant no a ricibi un cen preto di Colegio Arubano pa su estudio.
Willem Bant no por a dedica tur su tempo liber na e studio ya cu e cu su casa tabatin dos yiu y e tabatin otro obligacion y hobbynan, e.o. core entre 5 y 10 km casi tur dia; hunga weganan amistoso di futbol y referee weganan di competencia di Aruba Voetbal Bond. Pesey el a establece pa su mes un regimen di dedica tur diasabra di 8 or di mainta te 4 or di atardi exclusivamente pa studia. Pa 10 aña el a mantene e regimen aki cu excepcion den vakantie. Durante e dies añanan Bant a lesa mas di 100 buki di escritornan Colombiano y bukinan cu ta trata di diferente aspecto di historia, cultura y geografia di Colombia.
Na 2014 a surgi e posibilidad di studia pa “Master of Education in Spanish” na University of Curaçaon (UoC) cu cursonan na Aruba mes. Willem Bant a pone e studio na Bogotá “na poco poco” y el a bay full speed cu UoC. Atrobe e tabatin Ramon Todd Dandaré como docente. Un otro docente conoci na Aruba tabata Wim Rutgers. Bant a completa e studio aki na aña 2016 y mesora el a resumi e studio na Universidad Santo Tomás den full speed.
E filosofia di Universidad Santo Tomás ta refleha e interes misionero di e universidad den e necesidadnan social y educativo riba nivel nacional. E meta ta pa haya un integracion di tur Colombiano sin importa nan estado financiero of social. Pa por contribui na e “propuestas didacticas”, Sr. Bant a dicidi di conoce Colombia profundamente.
Conoce Colombia y e Colombianonan! El a haci mas di 20 trip pa Colombia den e dies añanan. Caminda e tabata bay el a conoce y combersa cu tur hende cu e por a topa. El a asisti Festival de Poesía de Medellín; el a haci un recorido den jungle saliendo di Santa Marta te Ciudad Perdida y bek; el a subi seroe Monserrate na Bogotá na pia; el a bishita hopi pueblo chikito manera Popayan, San Agustin, etc.; el a haci un vuelo Villavicencio – La Macarena / Villavicencio – Mitú / Villavicencio – Cumaribo den un DC3 anciano cu ainda ta bula regularmente entre e pueblonan aki. DC3 ta un avion cu Douglas Aircraft Company a stop di fabrica na 1942, mas di 75 aña pasa. Su amigonan tin rason ora cu nan ta chansa cu Willem Bant a “colombianiza” su mes. E conoce mas di historia, di cultura, di literatura y geografia di Colombia cu mayoria di Colombianonan mes. Y cu e conocemento aki, Sr. Bant a logra di pasa su examennan recientemente pa por gradua.
Normalmente, Willem Bant su contactonan cu e docentenan on-line tabata hopi amistoso ya cu mayoria tabata comparti e sentimentonan di un studiante stranhero biba pafo di Colombia. Lastimosamente, algun biaha, e tabatin experiencia fastioso cu algun docente cu no tabata por of no tabata interesa di mira di perspectiva di e studiante. Danki Dios no frecuentemente. Regularmente e mester a somete un ensayo of pasa un examen “on line”.
Su examen final tabata pa defende su tesis via Skype for di Aruba dilanti di un publico Colombiano na Bogotá den e aulanan di Universidad Santo Tomás. Su scriptie “La imagen de Holanda y los holandeses en la novela ‘Una holandesa en América’ skirbi pa Soledad Acosta de Samper na aña 1880. E buki a duna Willem Bant un sentimento unico como Hulandes.
Mi ta spera cu e logro di Willem Bant sirbi como ehempel pa hopi. Cuminsando cu un deseo, un soño, Willem Bant a lucha 10 aña largo contra hopi obstaculo, pero nunca el a entrega. Y el a gradua Cum Laude! Awor Klaas Jr., yiu mayo di Willem Bant ta cabando su estudio na Hulanda y e ta spera di sigui paso di su abuelo y su tata y bira di tres generacion di famia Bant pa duna les na Colegio Arubano.
Mi ta kere cu mi ta papia pa tur su amigonan di Aruba bisando:
“Pabien, Willem Bant! Proficiat! Nos ta orguyoso di bo”
Skirbi pa: [email protected]
