Partido AVP a tuma nota cu tin un partido politico cu specificamente a core campaña cu e ta bay legalisa droga na pais Aruba y cu a pone como condicion tambe pa e lo a participa den gobierno, cu nan lo mester legalisa droga.
Segun parlamentario Arthur Dowers, a bisa hopi cla cu AVP ta contra di e posicion tuma door di e partido aki, pasobra no ta kere cu bao di e circunstancianan cu nos pais ta, por legalisa droga.
A mira riba e realidad y loke e droga por causa den comunidad y a kere cu mester por proteha nos pais contra esaki. Tempo cu Dowers tabata minister di husticia, a pasa diferente ley y Aruba ta e pais cu tin e leynan mas estricto contra di droga den Reino na e momentonan aki. Segun Dowers, ta un cos cu tey pa historia. Sin embargo ta mira cu tin personanan cu ta hiba un discusion riba e parti medicinal of e parti cu e marihuana lo por uza pa cierto malesanan of atende cu cierto malesa of cierto sintomanan.
Dowers a bisa bon cla cu e discusion riba marihuana medicinal, ta un decision cu tin cu wordo hiba door di cientificonan y den e sector di salubridad publico. E no ta un discusion cu mester wordo hiba door di un miembro di parlamento cu ta uzado di droga of cu ta produci droga. Dowers sa cu e negoshi di marihuana por trece placa, mescos cu tur e otro cosnan malo cu por tin, ta trece hopi placa. Pero no ta kere cu por hustifica e discusion aki di forma cu ta hiband’e. Marihuana tin cierto riesgonan pa hendenan den desaroyo y ta algo sumamente importante. Cada biaha tin discusion cu alcohol ta malo. Pero loke cu no ta tende ningun di esnan cu ta promove marihuana ta bisa tambe cu marihuana ta malo pa cierto hendenan.
Haci como sifuera cu marihuana ta bon, y cu tur otro cos ta malo. Marihuana tambe tin su riesgonan. Pesey si atende como medicina, por limita y por atende cu e risiconan aki. Y si atende cun’e di forma responsabel, como hendenan adulto, tambe bo por mitiga cierto risiconan. Sin embargo, ora cu duna marihuana liber na tur hende den comunidad, bo sa cu bo ta perde un parti di bo sociedad, partinan jong den sociedad ta bay perdi. No ta bisa ningun hende grandi kico pa haci cu su bida, pero sin embargo ta bisa si, cu no ta kere den pusha marihuana riba mucha. Ta mira hopi biaha cu muchanan chikito ta haya droga, pa sea abusa di nan, of haci cos cu nan no lo haci.
A mir’e na varios ocasion caminda cu nan ta uza mucha pa comete actonan di crimen, ta duna nan droga of paga nan cu droga. E cosnan aki ta desaroyonan cu mester wordo papia di dje. Tur hende ta papia como si fuera cu Marihuana ta algo romantico of medicinal y no ta berdad. E tin su banda mahos tambe. Si bo ta un hende grandi y planta mata di marihuana den bo cas, no ta mete cubo. Pero no ta bon, si abo ta bay bin cu un plantacion di marihuana y dune na mucha. E discusion eynan mester wordo hiba habri. Dowers no tin problema pa papia cu hende cu ta pro droga.
Loke ta lamentabel ta cu ta mira cu hopi hende den comunidad a haya manera miedo di papia di e consecuencianan di droga, alcohol y hopi otro substancia cu ta malo, pasobra tin un gobierno cu ta narcocomplaciente. Bo ta mira hasta e organisacionnan cu ta traha activo di prevencion den esaki, masha poco bes ta haya nan ta bisa algo. Masha poco ta tende un maestro ta sali y bisa, droga ta causando problema pasobra tin un gobierno nacrocomplaciente y tin miedo di papia di droga. E momento aki, e discusion mester wordo hiba amplio. Dowers ta respeta hende su opinion. Esey no kiermen cu no ta di acuerdo. No lo bay bringa ni insulta.
Ta bisa si cu no ta di acuerdo cu punto di bista y no tin ningun hende pa convence Dowers den e grupo aki cu e meta cu nan tin principalmente, haci algo cu ta na bienestar di comunidad. Sa cu tin un grupo cu ta pushando pa e parti comercial di dje, pasobra nan tin beneficio y tambe por ta tin un grupo cu berdaderamente ta papia di e parti medicinal, pero mester hiba e discusion ey na e plataforma di cientifico, dokternan y di salud, y no den e plataforma cu nan tin planeando awor aki cu nan kier pa e droga aki bin pa tur hende disponibel. Mesun cos cu ta bisa cu droga tin risico, alcohol tin risico, tin mas cu tin risico y mester papia riba con pa preveni, pa mas hende y sigur pa hende hopi jong, haya nan envolvi cu e tipo di productonan aki y cu por haci daño na nan.
E aspecto medicinal ta para completamente habri pa hiba e discusion ey. Pero esey ta un discusion medico, mescos cu tur otro droga cu ta wordo importa den cuadro medicinal, e no tin ningun polemica cu ta hiba den comunidad den un base cientifico y ta wordo treci na e pais. Y ta mira cu eynan no tin problema.
Lamentabel ta cu tin hende cu a hala e discusion pa loke ta e parti medicinal den e esfera recreacional y ta creando un polemica segun Dowers, innecesario den nos comunidad.
