Mediador di gobierno tabata tin un reunion cu FTA y gerencia di CITGO. Anselmo Pontilius, mediador di gobierno, a splica cu na Februari, FTA ta esun cu a pidi un referendum pa staff cu nunca tabata organisa den un sindicato y a acerca e sindicato pa bira miembro. E referendum a tuma luga y FTA a logra haya mayoria di e trahadonan cu ta den staff pa bira miembro. For di eynan e partidonan a trata di sinta na mesa cu gerencia di Citgo, y esey no tabata e caso.
Segun e situacion a bira mas dificil e presion riba FTA a bira grandi pa trata di haya gerencia na mesa pa clarifica kico ta e futuro di e trahadonan. Si por corda siman pasa, gerencia a reuni cu mas of menos 83 trahado cu ta trahadonan permanente di e compania, pa informa nan cu un di e puntonan di preocupacion a sali ta si e situacion sigui asina, cu nan por reduci mas persona of mas trahado.
E punto ey FTA kier a clarifica y a pidi pa mediador coordina e reunion. Dialuna ultimo, a reuni y den e reunion eynan, di parti di gerencia di CITGO nan no ta hopi cla den nan splicacion, con e situacion ta, con e asina yama efectonan di e embargo, si por yame asina y medidanan cu gobierno Mericano a tuma, cual ta afecta e hayamento di entrada cu nan mester haya como compania.
Pero den e reunion di dialuna, loke ta e exigencia di parti di FTA ta, cu si por garantisa cu tur e 83 trahadonan aki ta mantene nan empleo y tambe con ta garantisa salario. Si por corda siman pasa tabata tin preocupacion riba pago di salario. Gerencia a splica cu esey no ta den nan man, sino cu tin un proceso manual cu a tuma luga na banco y esey tabata tin poco tardansa.
Dos punto a wordo trata. Uno ta e pago, esta e salario di cada kincena y tambe e hecho cu tin preocupacion si cu si lo bay reduci trahado. Di parti di FTA nan tabata hopi cla, cu pa mantene e contacto habri aki y cu FTA lo presenta un protocol pa wordo firma hustamente trata di garantisa cu tur hende ta mantene nan empleo, mientras ta purba di busca e salida, cu entradanan toch por drenta via e canalnan legal, sin cu ta afecta e medidanan cu a wordo tuma, of e sancionnan cu a wordo tuma.
Na e mesun momento keda cu e canalnan habri. Informacion directo pa e trahadonan pa evita cu tin speculacion cu si por reduci personal, si of no. Ademas, corectamente abogado di FTA a señala na e compania, cu evita cu di un dia pa otro bo ta yega cerca e trahadonan cu un carta pa termina nan relacion di trabao.
No mester lubida cu tur e trahadonan aki ta permanente na trabao. Si e dunado di trabao kier yega un areglo mes, mester canalis’e via sindicato. Den e caso aki sindicatonan pasobra tin IOWUA tambe. Eyriba a mustra pa tene e canal ey habri y a palabra entre FTA y CITGO cu nan lo bin bin bek a corto plazo pa firma un documento cu ta bisa con nan lo sigui atende cu otro.
Trankilidad of no
Segun Pontilius, Gerencia di CITGO ta señala apesar di tur e noticianan menos positivo cu ta bin ta saliendo, di nan parti nan ta trahando constantemente pa mira con por, hunto cu CITGO na Merca, purba di haya e fondonan necesario cu mester ta na Aruba, cu ta pertenece na e compania na Aruba. Di parti di FTA, a bin e pregunta, con largo esaki por yega.
Nan no por a duna un claridad riba esaki, con largo por keda mantene bo mes di e forma aki, sin cu ta haya entrada y toch bo tin gastonan mensual.
Ta gastonan grandi cu ta papia di dje, cu ta rond di 2 miyon dollar pa luna, pa cumpli cu nan obligacionnan. E parti aki no por a wordo garantisa, pasobra ta conciente cu tin un situacion dificil, pero pa e rason aki mes a pidi e partidonan pa mantene contacto constante pa evita cu e trahadonan sigui biba den incertidumbre cu nan ta aden.
E incertidumbre lo keda pero por lo menos ta canalisa awo. Diabierna tabata tin hopi speculacion cu no lo tabata tin salario. Ta pidanan cu tin cu wordo evita. E partidonan a papia hopi cla cu otro y eventualmente mester sinta otro siman cu por pone riba papel loke cu a keda acorda. Papel por tuma tur cos, pero finalmente ta e realidad ta conta. Den e realidad aki tin dos punto. Uno ta salario cu por wordo garantisa pa e dianan cu ta wordo traha y di dos ta cu si acaso mes e compania dicidi cu nan ta bay y/of nan kier reduci personal, cu nan tene contacto prome cu e sindicato, prome cu acerca e trahadonan cu cualkier forma di areglo pa retiro, Pontilius a mustra.
