Direktora di rekurso humano nobo na CMC

449

Hunta di direktiva di Curacao Medical Center ta deseá bon biní na su Direktora nobo di Rekurso Humano i Desaroyo Organisashonal, Sra. Yunaira Phelipa. Sra. Phelipa a djòin CMC promé di Sèptèmber ku mas di 18 aña di eksperensia amplio riba tereno di rekurso humano i ku eksperensiá den industria polisial i médiko. Su último nombramentu tabata komo hefe di Rekurso Humano na Korps Politie Curacao (KPC), kaminda Sra. Phelipa a laborá pa 12 aña.

Na KPC Sra. Phelipa tabata duna konseho tokante e maneho, i tambe tabata enkargá ku tur planifikashon, kòntròl y kapasitashon di rekurso humano. Promé ku esaki e tabata hefe di rekurso humano na Curaçaose Droogdokmaatschappij N.V. Ademas, Sra. Phelipa a fungi komo coach pa e trayekto di desaroyo di maneho di “Federatie Zorginstellingen.”

Sra. Phelipa a kompletá su estudio spesialisá den Personal i Labor. E ta un profeshonal ku pashon pa Rekurso Humano. Di un banda e ta un “Team player” ku un bon dósis di kapasidat analítiko i di e otro banda e ta un persona ku gusta motivá hende.