E actual Director di CITGO Petroleum Corporation, Jose Angel Pereira Ruimwyk, ta deteni na Caracas desde awe merdia, acusa di corupcion, enrikece su mes y legitimacion di capital di pueblo. Separa di e cabes di CITGO, conoci tambe na Aruba, tambe a detene e ex Director di CITGO Aruba, esta Alirio Zambrano y su ruman Jose Luis Zambrano, entre otro funcionarionan halto mas cu tambe ta encarcela.
Di acuerdo cu noticianan saliendo for di Prensa Venezolano, parce cu e compania nacional Petroleos de Venezuela, conoci como PDVSA, a keha e cabes di su compania CITGO, pa a haci un fiansa di 4 mil miyon dollar, sin haya aprobacion prome di PDVSA cu ta e unico doño di CITGO. E Fiscal di Venezuela ta acusa e top di CITGO cu nan a facilita informacion confidencial na e financiadonan na nan propio beneficio. Ta papia di un “finder’s fee” di 1.5% di e transaccion completo, pues cu e ehecutivonan a haya no menos di 60 miyon dollar pa nan mes!
For di CITGO Aruba ainda no a sali ningun informacion, ni tampoco con e detencion aki lo por tin consecuencia pa e operacion di CITGO na Aruba. Tin fuentenan ta indica cu posiblemente e financiamento di 4 biyon dollar aki lo por tin di haber cu e proyecto di Aruba mes. Cu e detencion aki e ora lo por tin mas tardansa atrobe den ehecucion di e “refurbishment” di e refineria cu CITGO ta huur riba nos isla for di Refineria di Aruba (RdA NV). E ponencianan aki sinembargo no ta confirma ainda.
