Meverly Romano, vocero di Departamento di Impuesto (DIMP) a splica awe cu mester paga e impuesto di auto tur aña y ley ta indica dos periodo durante di aña caminda cu por paga esaki. E prome fecha ta caduca dia 31 di januari y di dos fecha ta dia 30 di juni. Pero e aña aki, dia 30 di juni a wordo extendi y a bira diabierna awo dia 31 di juli. Esey ta e fecha final pa paga impuesto di vehiculo di motor pa loke ta e di dos mita di aña 2020.
Esaki ta hopi importante pa menciona, pa motibo cu na e momentonan aki tin 62.223 number, riba cual tin pago di impuesto registra. Esaki ta representa 70% di e total. Tin na e momentonan aki un total di 88.927 number registra. Ta nifica cu ta yegando e cantidad di 89 mil number. Ta un cantidad basta grandi. Pues 70% a cumpli cu e pago di impuesto, pa cual DIMP ta gradici su contribuyentenan tambe pa cumpli debidamente cu esaki. Esaki ta loke ta hopi necesario na momento cu un persona tin un vehiculo di motor y ta uza nos careteranan publico.
Incumplimento
Pa loke ta incumplimento, tin na e momentonan aki un total di 12.982 number, riba cual a paga e prome mita di aña, pero falta pa paga e di dos mita di aña. E grupo aki di 12.982, no por bisa ainda cu nan ta den incumplimento, pasobra ainda nan tin un paar di dia pa nan haci nan pago. E fecha final ta dia 31 di juli. Pero mirando cu ta un cantidad toch basta grandi, kier trece dilanti pa haci un apelacion na e clientenan cu tin e prome mita di aña paga, pa tene cuenta cu den algun dia ta yega e fecha final y e cantidad ta hopi grandi.
DIMP ta recomenda e clientenan aki pa haci e pago di e impuesto, preferibelmente via online banking, via nan banco, pa asina e pago por drenta na tempo y e por wordo registra tambe riba cuenta di DIMP na tempo. Pa loke ta trata incumplimento total di e aña aki, tin te na e momentonan aki un total di 9.869 number cu no tin ningun pago mes riba dje. E personanan cu tin e numbernan concerni no a haci ningun pago, ni pa e prome mita di aña, ni pa e di dos mita di e aña.
Kiermen en total, esaki ta representa 11% di e cantidad cu tin registra y e categorianan cu ta resalta den e incumplimento total aki, ta e plachinan di categoria A, cu 8.935, cu no tin ningun pago mes pa loke ta trata 2020 y e trucknan di diesel, cual ta 81, tin e motorcyclenan 325, cu no tin nada paga pa loke ta trata 2020 y e plachinan di nomber 126 y V-car cu ta un total di 294.
Pero e total di incumplimento pa loke ta 2020 cu no tin nada mes paga, ta 9.869, cual ta 11%. Di e cantidad tambe, tin 3.853 contribuyente cu a entrega nan plachi di number y a avisa cu e plachinan no ta den uzo pa un periodo of no ta interesa pa uza e plachi mes mas debi cu kisas nan a bende nan auto. Esaki ta e situacion cu tin na e momentonan aki y un biaha mas e apelacion ta bay pa e pagonan por drenta no mas laat cu dia 31 di juli.
Multa di 50% extra entrante dialuna
Esnan cu paga laat, esnan cu no a alcansa pa paga dia 31 di juli, DIMP a anuncia cu desde 1 di augustus si yega na DIMP na caha, e ta bay wordo cobra 50% di boet riba e suma di belasting cu e falta pa paga. Kiermen ta hopi importante pa tene cuenta cu pa dia 1 di augustus, ya caba e boet di 50% di e suma di belasting ta drenta na vigor. Kiermen pagonan cu drenta laat, e cliente mester sa cu e lo bay tin algo extra pa paga na e boet. Esaki ta un suma cu no ta recomendabel. E no ta algo cu ta necesario tampoco. Si solamente e contribuyente a tene cuenta cu e fecha final di 31 di juli.
Polis ta cuminsa controla na september
Pa loke ta control di polis, DIMP lo bay duna Cuerpo di Polis un carta despues di dia 31 di juli, cu entrante 1 di september, nan por cuminsa controla riba caya. Kiermen DIMP ta mantene ainda despues di 31 di juli, un luna ainda, dunando e contribuyentenan espacio pa nan por paga nan belasting, aunke ta recomenda pa paga esey prome cu dia 1 di augustus. Entrante e fecha aki, e boet ta cuminsa core. Pero pa esnan cu no a ricibi nan plachi, ainda ta duna un luna di tempo pa nan por haci nan cita y busca nan plachinan di number.
Entrante 1 di september Cuerpo di Polis lo cuminsa controla riba caya y na e momentonan ey si tur e automobilistanan mester percura pa nan auto tin e plachi di number blanco cu cora riba dje.
