Desde diasabra ultimo, e Ministerio di Infrastructura y Medio Ambiente ta resortando directamente bou di Minister Presidente, mr. Evelyn Wever-Croes, aunke ta temporalmente pa por keda cla cu e impasse den POR. Sinembargo, e mesun mandatario a sigura cu e ta keda cu e cartera un rato pa garantisa cu ta investiga tur e casonan pendiente di corupcion. No ta conoci si e prome mandatario ta consciente cu den dicho investigacion e tin colega den Conseho di Minister cu tambe nan nomber ta menciona di maniobranan ilicito of tumamento di sponsorship a cambio di tereno of fabor!
Fuentenan yega na e caso a sigura na nos cu diabierna ultimo, despues di e reunion di Conseho di Minister, cu pa algun ora Minister Marisol Lopez-Tromp a pasa na Landsrecherche. Kico tabata motibo di su bishita eynan no ta conoci. E mesun fuentenan ta indica cu awe diamars a nota presencia di recherchenan di Landsrecherche na Departamento di Finansa di Gobierno, acumulando documentonan y informacion for di e sistema computarisa eyden. Kico nan ta investigando y ken nan ta investigando no ta conoci. Pero, tin tur indicacion cu e caso di Departamento di Infrastructura y Planificacion (DIP) ta mas grandi cu hopi a spera.
Siman pasa politica na Aruba diripiente a bira “cayente” ora cu e director di DIP, den nomber y riba instruccion di Minister di Infrastructura, Marisol Lopez-Tromp, a suspende y a prohibi entrada na 4 diferente empleado. Tur di nan, sea coordinadornan of figuranan yega na ex Minister Otmar Oduber of na e partido politico POR. Es mas, un di esunnan bou investigacion ta Ronnie Maduro, cu ta un politico activo di POR, cu a participa den ultimo eleccion riba lista.
Fuentenan den DIP a sigura na 24ora.com cu e investigacion tin diferente pia. Un di nan ta e caso cu Ministerio Publico hunto cu Landsrecherche y Afpakteam ta investigando Otmar Oduber di dje actualmente. Esun di su coordinadornan ta un fraude pisa cu tin internamente cu terenonan huurgrond, den cual ta bisa e ciudadano cu su papelnan no ta na ordo y ta manda nan pa bay na e consultant di Otmar Oduber pa e yuda nan pa keda cla mas lihe. Pues for di DIP mes, unda mester regla tereno GRATIS pa pueblo, ta manda ciudadanonan pa un oficina situa riba L.G. Smith Boulevard cerca Notario Yarzagaray, pa eynan paga pa por haya yudansa cu un tereno cu nan tin derecho riba dje. Pa e motibo aki tin empleadonan suspendi y cu prueba di combersacion via whatsapp, documentonan y mas. Deliberadamente no ta yena tur informacion den e sistema di DIP pa por cobra hende. Segun e team di investigado, ta masha tempo tin rumor di corupcion cu tereno, pero a traha un trampa y e djacanan a cay den dje!
Pero esey no ta tur. Tin un comerciante cu a pidi un tereno grandi cu ora e no a logra keda cla, a laga sa cu el a sponsor un Minister di MEP cu a primintie cu “Mi lo regla cu Otmar” pa e haya su tereno. Mescos cu varios otro a cay den e caso di ex-Minister Paul Croes, aki tambe tin prueba via whatsapp den cual a manda mensahe y voicenote den cual e comerciante ta compromete su mes y e minister. Es mas, despues cu a informa e minister cu tin declaracion comprometedor contra dje, el a yama e comerciante bek pa reclam’e dicon e ta papia e cosnan ey via whatsapp.
Si sigui e “timeline” bon, anto por conclui cu ta un “dossier” basta grandi y di hopi documento y prueba a presenta siman pasa na Landsrecherche relaciona cu corupcion cu tereno comercial y tereno domestico. “Nan a bira golos y slordig. Mucho hende sa caba di nan cosnan”, asina un empleado di DIP a conta nos den confiansa. E ta mira precies con cierto terenonan ta aparece constantemente ariba den e lista di prioridad pa e director firma y manda pa minister. Ta cada bes e mesun nombernan y di e mesun companianan ta keda bin ariba, casi un hende lo pensa cu ta “suerte” nan tin cu ta nan terenonan so ta sali prome. Pues no tabata dificil pa identifica cua ta e empleadonan cu ta traha den DIP pero cu ta sigui instruccion di pafo, pa cual husticia ta investigando awor di ken nan ta ricibi ordo via celular of nan email personal pa procesa terenonan y a cambio di kico of di cuanto placa.
Den DIP ta papiando hasta di tereno pa plantacion di cannabis, den cual den MEP mes tin varios grupo cu ta mata pa haya tereno y ta busca tur forma pa “via via” keda cla lihe cu e proceso. A tende di “fast track” y a pensa cu esey ta conta pa tur comeriante cu ta yega na un Minister. Mester tene cuenta cu Minister Andin Bikker a nombra Otmar Oduber como presidente di e comision principal cu ta maneha tur proyecto Fast track, pues de facto, un persona cu tin un consultant priva, ta dicidi cua proyecto tin prioridad y cua tereno mester sali prome. Bo no mester ta Polis pa Bo investiga e ora ta unda “deliberadamente” a confia pushi cu pisca, a sabiendas cu e ta un sospechoso di husticia!
Conocedonan di nos codigo di procedimiento penal a sigura nos cu asina un keho oficial drenta na Landsrecherche, cu ta imposibel pa un otro minister par’e of wanta e investigacion. Parce cu VNO y Gabinete di Gobernador y hasta Minister Presidente Evelyn Wever-Croes ta na altura di un cantidad di keho di corupcion cu tin den DIP y e mes a conseha pa bay Landsrecherche! Pero, e lo para pa e investigacion awo? E lo permiti pa su mesun Ministernan di su mesun partido a tuma placa sushi of a crusa e liña di locual ta permiti pa ley? Ainda ta sigur cu kier core cu Minister Marisol Lopez a sabiendas cuanto prueba y filenan grandi tin di corupcion miyonario de Serlimar y den DIP?
E simannan cu ta bin lo bira masha interesante, specialmente pasobra “pa casualidad” Marisol Lopez ta na Hulanda awor cu vakantie. Ken por bisa si e no ta pasa bishita Ministerio di Asuntonan di Reino Hulandes pa splica nan kico tur ta pasando den Gobierno na Aruba y e motibo real dicon kier core cu ne pasobra el a para corupcion y a para fraude pisa den su departamentonan? Cu un scenario asina, mas lihe Hulanda lo interveni y no solamente manda Koninklijke Marrechaussee sino tambe lo manda un ekipo special di Rijksrecherche pa “reenforsa” e ekipo di Landsrecherche di Aruba pa garantisa cu no tin metemento di politica den nos sistema hudicial y den nos capacidad pa investiga corupcion na gran escala den gobernacion di nos pais.
