Desde 6 di maart DIMAS lo tin un proceso nobo unda cu awor e cliente ta haci su cita online y e ta bin DIMAS riba e dia y ora cu e tin cita. E ta haci su entrega di documentonan rekeri y su permiso lo wordo procesa dentro di un termino di 2 siman y na final, si esaki sali positivo e lo ricibi esaki den forma di un carnet.
Tambe tur esun nan cu tin un peticion ya den tramite y cu ta yegando na un final aworaki y pa cual a tuma un desicion postivo, e cliente lo ricibi esaki den forma di carnet.
“DIMAS ta hopi contento di a logra bay na e next level unda cu lo trata tur locual ta peticionnan pa un permiso di extencion di estadia na Aruba dentro di algun siman y cu tempo ta spera di por bay cu esaki te na un servicio di un dia (same day service).”
Tur locual ta peticionnan entrega na luna di maart, cu ta un prome peticion of un peticion pa un cambio di sea meta di estadia of funcion lo wordo procesa den un termino di 1 luna.
Esey ta e cambio cu a tuma lugar entrante maart. E carnet lo wordo entrega hunto cu e permiso riba papel. Riba e permiso ainda tin para e condicionnan y riba e carnet tin e informacion nan basico manera nomber, tipo di permiso, pa cuanto tempo y cu esaki e persona por mustra facilmente cu e ta legal na Aruba y un tercero por wak di biaha kico ta e condicionnan bou cual ela haya e permiso, por ehempel si ta un permiso di famia of trabou.
Di e forma aki DIMAS ta sigui innova y mehora nos servicio na publico.
