Riba 17 di september proximo ta tuma luga e Ironman Challenge na Cartagena, Colombia. Un evento grandi caminda cu miles di atleta rond mundo lo core, landa y core riba bais pa un distancia basta largo. Entre e miles di atletanan, Aruba tambe lo tin su representante. Diederik Kammeling tin diesun aña ta biba na Aruba, e tambe lo participa den e evento grandi aki caminda e lo sa di hiba e bandera di Aruba tur rond caminda e bay. E no lo bay su so, e website di pueblo, 24ora.com tambe lo compañ’e p’asina mantene pueblo informa riba su desaroyo na Cartagenta, Colombia.
Tur cos a cuminsa na luna di februari 2023 ora cu un amigo di Diederik a “yam’e afo” p’e participa den e evento aki. E amigo ya tin algun aña ta participa. E no a ria y a bisa “si”, asina preparacion a cuminsa pa e hazaña aki. E no ta facil, Diederik tin un entrenado special kende a percura p’un schedule p’asina e por mantene su mes na dje. E ta train cada dos dia, na comienso el a train dimas pa cual su curpa tabata keda demasiado cansa. Esaki a ocasiona tambe cu el a perde hopi peso, pero desde algun siman, a adapta e schedule y ta “back on track”y tur cos ta cla pa e Ironman Challenge.
Tin diferente Ironman, esun cu Diederik lo participa; lo ta 1.5 kilometer ta landamento, 40 kilometer riba bais y 10 kilometer na pia. Tur esaki lo ta den e temperatura cayente di Cartagena y sin biento. E ta adaptando su mes na e cayente cu su trainnan na Aruba. E ta un reto, si mira bek desde comienso, el a crece hopi. E no tabatin condicion ni pa core 400 meter, landamento no tabata parti di su dia diario pero pocopoco a siña y adapta su mes pa e aventura nobo aki.
E combinacion di famia y deporte no a bay facil, durante dia ta traha mientras cu anochi laat of mainta trempan e ta dedica na e deporte.
