Jazz Appreciation Month of JAM ta un celebracion anual desde 2006 y for di e mesun aña e ta tumando luga na Aruba tambe. Esaki ta haci di Carlos Bislip’s Jazz Expo e evento musical di jazz cu mayor trayectorio riba nos isla. Pa 2022, e itinerario ta conta cu presentacion special di Caribbean Combo, Stephen Diaz’s Trio, Angelo Kock’s Trio y Carlos Bislip’s Septet consistiendo di e miho talento musical local.
E cita ta diasabra awo 30 di april, Dia Internacional di Jazz, na Hoya Lush Cafe riba Plaza Daniel Leo na Havenstraat entre 7:00 pm pa 10:30 pm cu un repertorio impresionante di nos talentonan riba scenario. E Jazz Appreciation Month ta crea pa rindi tributo na jazz como un genero musical tanto bibo, como historico. Scol, organisacion y gobiernonan ta celebra JAM cu concierto gratis y programa educacional. For di 2015 y cu cooperacion di partners local, a logra trece musico internacional, cu na mesun momento a fungi como educadonan di e talento hoben ofreciendo tayer.
E aña aki, JAM ta explora e mescla di musica Afro Caribense y jazz cu a hiba na e formacion di Latin Jazz. Un di e figuranan icono den e tradicion di musica Afro Caribense ta e bahista, lider di banda, compositor y co creador di mambo, Israel Cachao Lopez. Manera e gran Nina Simone a bisa, “Jazz no ta djis musica, e ta un estilo di bida, e ta un manera di ta, un manera di pensa”.
E storia di jazz ta skirbi den e buskeda pa dignidad humano, democracia y derecho civil. El a duna forsa na e lucha contra discriminacion y racismo. UNESCO ta kere den e poder di jazz como un forsa di paz, dialogo y comprondemento mutuo y p’esey na november 2011, e Conferencia General di UNESCO a proclama dia 30 di april como Dia Internacional di Jazz.
“E di dies Dia Internacional di Jazz ta un oportunidad pa celebra un biaha mas cu e tradicion musical rico aki.
“Jazz ta un realidad multiple, traha door di encuentro entre diferente cultura, instrumento y hende. Pa varios decada jazz ta vibra cu tur cos cu musiconan pone den dje, mientras e ta sigui invita nos pa un horizonte nobo den e zonido di cada nota”, asina Audrey Azoulay, Director General di UNESCO a bisa.
Carlos Bislip’s Jazz Expo ta posibel danki na e contribucion di e programanan manera Prins Bernhard Cultuurfonds, proyecto asina por haya continuidad y efectividad pa su desaroyo y p’esey ta manda palabra di gradicimento pa nan apoyo y sosten pa Jazz appreciation month celebration aki na Aruba.
Un danki tambe na e contribucion di Hoya Lush Cafe, Vibration PR, Aruba Tourism Authority (ATA), Aruba Airport Authority (AAA), SETAR, Departamento di Cultura Aruba (DCA), Prins Bernhard Cultuurfonds Caribisch Gebied (PBCCG), Walking Turtle Entertainment, Renaissance Wind Creek Aruba Resort, Cliffix, Scol di Musica Rufo Wever y Minister di Asuntonan Economico, Comunicacion y Desaroyo Sostenibel, mr. Geoffrey Wever. E evento ta habri pa publico, sinembargo ta recomenda pa tuma contacto cu Hoya Lush Cafe pa asina bo tin bo mesa reserva pa disfruta di e fabuloso anochi aki di musica bou di streanan den curason di Oranjestad.
