Despues di a tene un recaudacion di fondo pa por logra saca e atleta Andres “Kendo” Hernandez for di Aruba, por fin diasabra anochi laat, banda di 11’or, Air Ambulance a hiba e hoben di 24 aña pa Cali.
Eynan tabata tin dokternan ta ward’e pa asina por opere di urgencia na su columna, mirando cu e no tabata sinti su pianan. Pero e recaudacion di fondo no ta keda te ey. Na Colombia mes nan a pidi pa un y tur pa yuda den loke por pa yuda cubri e gastonan di operacion cual ta costoso.
E consulado di Colombia a keda encarga pa busca e placa recauda y entreg’e na e mama di Andres y finalmente a logra paga e ambulance y e gastonan medico, pa cual e seguro a cubro. E avion mes a keda cuadra na Colombia mes.
Naturalmente ta gradici tur esnan cu a yuda aki na Aruba, pa e colaboracion pa un hoben, den flor di su bida, a sufri un accidente cual el a scapa milagrosamente, sinembargo, a afect’e siguramente den e deporte cu e gusta masha cual ta Crossfit.
24ora.com ta desea Andres un pronto recuperacion.
