Campeonato di Aruba Softball fast pitch femenino U17 ta drentando su recta final. Eagles di San Nicolas ta enfrentando Rockets di Sta Cruz den e seri final esta playoff di best out of 3 pa disputa pa e titulo maximo esta campeon di Aruba. Eagles kendenan a jega final invicto ta keda faborito pero manera nan ta bisa e bala ta rondo y esun cu hunga e serie mihor lo bay cu e titulo.
Eagles ta anota 6 careda den bom di promer inning y ta amplia cu 1 careda mas den bom di 2 inning. Den cabez di tres inning Rockets ta menasa y ta anota 1 careda mientras Eagles ta responde cu 4 careda mas den bom di 4 inning pa seya e promer victoria di e playoff final. Eagles 11 careda, 9 hit, 1 error y ta laga 3 coredor na base. Rockets 1 careda, 0 hit, 4 error y ta laga 4 coredor den circulacion.
Mihor bateadornan pa Eagles ta Keyla Cham 3-2 incluyendo un doblete, Destiny Johnson 3-2 cu un doblete mas 2 rbi y 2 careda anota, Myah Thompson di 3-1 cual bataso tabata un doblete, Ashmilayne Maduro di 3-1 cu un triple, Zoe Emen 2-1 cu un triple mas 2 rbi, Thulaika Rodgers y Jalliyah Versprey di 2-1.
E rising star di apenas 16 aña Yei Mei “Beba” Cheong ta lansa un “no hitter” den un forma imprecionante dominando Rockets por completo seyando e victoria riba su nomber alaves ta pone su mes como contender pa un MVP di e seri final. Beba Cheong a enfrenta 17 bateador lansando 25 bola, 36 strike pa un total di 61 pitch, no ta permiti hit, ta ricibi 1 careda sushi contra ponchando un total di 6 bateador y ta regala 4 base por bola y por mira atras riba un performance excelente.Jaysjelienne Kock ta resulta pitcher perdedor lansando 35 bola, 41 strike pa un total di 76 pitch permitiendo 11 careda tras di 9 hit y ta regala 2 base por bola.
Por mira bek riba un tremendo campeonato U17 femenino unda atletanan ta compitiendo na un manera sano contra otro riba un bon nivel. Klaro tin espacio pa mas desaroyo pero por premira un campeonato U17 mas grandi pa 2020. Cu e resultado aki Eagles ta na 1 wega di e titulo y Rockets ta lomba contra muraya y mester un victoria pa extende e serie.
Diahuebs di October 7pm den categoria AA Rockets lo enfrenta Eagles y pa 830pm Aruba Bank lo termina un solo inning di un protesta cu nan a gana vs Jaguars y mesora nan dos lo hunga un wega di tercer round. Diabierna 4 di October pa 7pm Eagles lo enfrenta Jaguars pa termina un wega cu a keda den di 4 inning dia cu coriente a bay y mesora lo hunga nan wega valido pa di tercer buelta y alaves e ultimo wega di campeonato regular preparando pa playoff AA.
